دوای هاککردنەکە؛ حکومەتی عێراق ئامێری نوێی ئەلیکترۆنی دابین دەکات

 

ئاڤا نیوز

دوای هاککردنی چەند وەزارەتێکی عێراقی، وەزیری ناوخۆ بڕیاریدا ئامێر و سیستەمی نوێی ئەلیکترۆنی بۆ وەزارەتەکە دابین بکرێت.

چیرۆکی سەرەکی: دوای ئەوەی گرووپێکی هاککەری ڕووسی سیستمی زانیاریی چەند وەزارەتێکی حکومەتی عێراقی هاککرد، وەزیری ناوخۆ بڕیاریدا ئامێری مۆدێرن و پێشکەوتوو و سیستەمی ئەلیکترۆنی بۆ بەڕێوەبەرایەتییەکە دابین بکرێت.

ڕاگەیێنراوی فەرمی: نووسینگەی وەزیری ناوخۆی عێراق ڕایگەیاند:  وەزیری ناوخۆ ڕێنمایی کرد کە سەرچاوە مرۆییەکان و لۆجستی و ئامێری مۆدێرن و پێشکەوتوو و سیستەمی ئەلیکترۆنی بۆ بەڕێوەبەرایەتییەکە دابین بکرێت، هەوڵ بدرێت بەپێی ئەو پێشهاتانە بێت کە لە سەرانسەری جیهان لە بەرەنگاربوونەوەی تاوانە ئەلیکترۆنییەکان ڕوودەدەن.

زانیاریی زیاتر: لە چەند ڕۆژی ڕابردوودا، گرووپی هاککردنی "بابووک رانسموێر"ـی ڕووسی سیستەمی زانیاریی چەند وەزارەتێکی حکومەتی عێراق، لەوانەش وەزارەتەکانی دارایی، ناوخۆ و ئەمیندارییەتی گشتی ئەنجوومەنی وەزیران بەشی ڕێکخراوە ناحکومییەکان، هاککرد و زۆربەی زانیاری و بەڵگەنامە نهێنی و هەستیارەکان بردراون.