سوودانی: لە قۆناغی بونیادنانەوەی دەوڵەت دواکەوتووین

ئاڤا نیوز

سەرۆکوەزیرانی عێراق دەڵێت، دوای سەرکەوتن بەسەر تیرۆر و دوو دەیە لە تێپەڕاندنی قۆناغێکی سەخت، ئێستا لە قۆناغی بونیادنانەوەی دەوڵەتدان کە تیایدا دواکەوتوون.

ئەوەی پێویستە بیزانیت: سەرۆکوەزیرانی عێراق شەوی ڕابردوو لەگەڵ ژمارەیەک لە زانا و مامۆستایانی ئاینیی لە پارێزگا جیاوازەکان کۆبووەوە و بەربانگی لەگەڵدا کرد، دواتریش لەبارەی دۆخی وڵات و پێکەوەژیانی پێکهاتەکان قسەی کرد.

لێدوانی فەرمی: محەممەد شیاع سوودانی، سەرۆکوەزیرانی عێراق ڕایگەیاند:

- مزگەوت و حسێنییەکان پێگەیەکی گرنگییان لە کۆمەڵگادا هەیە، مامۆستایانی ئاینییش لە لێکنزیکردنەوەی نیشتمانی، ئاشتی کۆمەڵایەتیی و کراوەیی بەڕووی هەموو پێکهاتەکانی کۆمەڵگادا دەنگێکی کاریگەرن.

- قۆناغی سەختمان تێپەڕاند و ئێستا لە دۆخی برایەتیی و هەماهەنگیداین، دوای ڕووبەڕوبوونەوەی تیرۆر کۆمەڵگاکەمان زیاتر یەکگرتوو  و خاوەن توانایە بۆ بونیادنانەوەی دەوڵەت کە تیایدا دواکەوتووین.

- پێویستییمان بە هەوڵی نیشتیمانیی هەیە بۆ ڕووبەڕووبوونەوەی ئەو مەترسییانەی لە ڕێگەی تۆڕە کۆمەڵایەتییەکان، بەرنامە و پێگەکان ئاراستەمان دەکرێن، لەم قۆناغەدا دەبێت پەیامی هۆشیاریی و دانایی پەیڕەو بکەین و پەرەی پێبدەین.