حەماس: دەرگای گفتوگۆمان دانەخستووە

 

ئاڤا نیوز

بەرپرسێکی بزووتنەوەی حەماس دووپاتی کردەوە، بزووتنەوەکە سەرەڕای ئۆپراسیۆنەکانی ئیسرائیل بۆ سەر کەرتی غەززە، دەرگای گفتوگۆی نەداخستووە و داوای لە وڵاتانی نێوەندگیر کرد ئیسرائیل بە جێبەجێکردنی ڕێککەوتنی ئاگربەست پابەند بکەن.

وێنە گەورەکە: دوای 57 ڕۆژ لە ڕاگرتنی شەڕ شەوی 18ـی ئەم مانگە، ئیسرائیل دەستی بە هێرشەکانی بۆسەر کەرتی غەززە کردەوە، بەمشێوەیە دەستپێکردنەوەی ئاگربەست نزیکە لە مەحاڵ.

لێدوانی فەرمی: تاهر نۆنۆ، ڕاوێژکاری میدیایی سەرۆکی مەکتەبی سیاسی بزووتنەوەی حەماس بە ئاژانسی فرانس پرێسی ڕاگەیاند، “حەماس دەرگای دانوستانی دانەخستووە و پێویست بە ڕێککەوتنی نوێ ناکات لەبەر ڕۆشنایی بوونی ڕێککەوتنێک کە لەلایەن هەموو لایەنەکانەوە واژۆ کراوە”.

حەماس داوا لە وڵاتانی نێوەندگیر و کۆمەڵگەی نێودەوڵەتی دەکات، ئیسرائیل پابەند بکەن بە وەستاندنی دەستدرێژی و جێبەجێکردنی ڕێککەوتنی ئاگربەست و دەستپێکردنی قۆناغی دووەمی ئاگربەستەکە.

باکگراوند: لەدوایین هێرشی ئیسرائیل بۆسەر کەرتی غەززە، پێنج بەرپرسی باڵای حەماس و زیاتر لە 400 هاوڵاتی فەڵەستینی کوژران و 562 کەسی دیکەش برینداربوون.