شاندی کوردستان: لە هەوڵداین هەفتەی داهاتوو مووچەی مانگی سێ بنێردرێت

ئاڤا نیوز

لە وەزارەتی دارایی عێراق وردبینیکردن لە لیستی مووچەی مانگی سێ دەستیپێکردووە، ئەندامێکی شاندی وەزارەتی دارایی کوردستانیش دەڵێت، هەموو هەوڵێک دەدەن هەفتەی داهاتوو پارە بنێردرێت و پێش جەژنی ڕەمەزان دەست بە دابەشکردنی بکرێت.

چیرۆکی سەرەکی: شاندی وەزارەتی دارایی کوردستان ئەمڕۆ سێشەممە لە بەغدا لیستی مووچەی مانگی سێیان ڕادەستی وەزارەتی دارایی عێراق کرد. لەلایەن تیمە تەکنیکییەکانی هەردوو وەزارەتیش دەست بە وردبینیکردن لە لیستەکە کرا.

لێدوانی فەرمی:  ئەندامێکی شاندی کوردستان بە ئاڤای گوت: لیستەکە بەپێی خواست و داواکاریی تەیف سامی و وەزارەتی دارایی عێراق ئامادەکراوە، هیچ کەموکوڕییەکی تێدا نییە، بۆیە پێناچێت وردبینی کاتێکی زۆری بووێت.

ئەوەی پێویستە بیزانیت: وردبینیکردن لە لیستی مووچەی مانگی دوو هەرچەندە کاتێکی زۆری پێچوو و  13 ڕۆژ وردبینی تێدا کرا، بەڵام دواجار بەبێ هیچ زیادکردن و کەمکردنێک وەکو خۆی پەسەند کرا و، هەرێمی کوردستان داوای چەند پارەی کردبوو هەمان بڕ نێردرا.

٠ لیستی مووچەی مانگی سێ بەهەمان میکانیزم و باشتر ئامادەکراوە، وەکو وەزارەتی دارایی دەڵێت هیچ کەموکوڕییەکی تێدا نییە، شاندەکەش بۆ ئەوە لە بەغدایە ئەگەر هەر پرسیار و تێبینییەک هەبێت ڕاستەوخۆ وەڵام بدەنەوە.


٠ تەیف سامی ئێستا بۆ بەشداریکردن لە کۆنفرانسێک لە ئەوروپایە، لە ڕۆژانی داهاتوودا دەگەڕێتەوە و ڕەنگە ڕۆژی یەکشەممە 23ی مانگ بچێتەوە دەوام. شاندی کوردستان دەڵێن لە هەوڵدان تاوەکو یەکشەممە وردبینیکردن تەواو بێت، بۆ ئەوەی بیخەنە بەردەست تەیف سامی تاوەکو بڕیاری لەبارەوە بدات. 

٠ هەوڵەکان بۆ ئەوەن هەفتەی داهاتوو پارەی مووچە بنێردرێت، بەو ئامانجەی پێش جەژنی ڕەمەزان مووچەی مانگی سێ دابەش بکرێت.