پرۆژەی ماستەرپلانی گەشتیاریی سۆران لە مین پاكدەكرێتەوە

 

ئاڤا نیوز

پرۆسەی لابردنی مین لەنێو سنووری پرۆژەی ماستەرپلانی گەشتیاریی سۆران بەردەوامە، دەزگای گشتیی كاروباری مین دەڵێت، تائێستا نزیكەی 20%ـی كێڵگە مینەكان پاككراونەتەوە.

چیرۆکی سەرەکی: دەزگای گشتیی كاروباری مین لەئیدارەی سەربەخۆی سۆران، لەمانگی تشرینی دووەمی ساڵی ڕابردووەوە، دەستیكردووە بە هەڵمەتی پاككردنەوەی شەش كێڵگەی مین كە دەكەونە سنووری ماستەرپلانی پرۆژەی گەشتیاریی سۆران، ڕووبەری سەرجەم كێڵگە مینەكانیش 712 هەزار و 548 مەتر دووجایە.

ڕاگەیێنراوی فەرمی: دەزگای كاروباری مین لەئیدارەی سۆران ڕایگەیاند، تائێستا 20%ـی كێڵگە مینەكان پاككراونەتەوە و 259 مینی دژەكەسی دۆزراونەتەوە.

بۆچی گرنگە: ئێستا پلانی دروستكردنی ماستەرپلانی پرۆژەی گەشتیاریی سۆران دەرچووە كە بەشێك لە زەویی تەرخانكراو بۆ پرۆژەكە، هێشتا لە مین پاكنەكراونەتەوە.

ئەوەی پێویستە بیزانیت: لەماوەی ڕابردوودا بەشێك لە پەیج و دەزگا میدیاییەكان، باسیان لە هەبوونی چەندین كێڵگەی مین لە سنووری ئیدارەی سۆران كرد و وەهایان نیشاندا كە چەندەها كارەساتی نەخوازراوی لێ كەوتووەتەوە، لەمبارەیەوە بەشی ڕاگەیاندن و بەبازاڕكردن لە بەڕێوەبەرایەتیی گەشتوگوزاری سۆران دڵنیایی دا لەوەی؛ ناوچە گەشتیارییەكانی دەڤەری سۆران سەلامەتن و ئەگەری ڕوودانی تەقینەوەی مین نەبووەتە سەرچاوەی هەڕەشە و مەترسی بۆ گەشتیاران و بابەتەكە بەو شێوەیە نییە كە بەشێك لە پەیج و دەزگا ڕاگەیاندنەكان بانگەشەی دەكەن.