دژەتیرۆری عێراق بە هاوکاریی ئاسایشی هەرێمی کوردستان دوو چەکداری داعش دەستگیر دەکات

ئاڤا نیوز

هێزەکانی دژەتیرۆری عێراق بە هاوکاریی ئاسایشی هەرێمی کوردستان، دوو چەکداری ڕێکخراوی داعشیان لە پارێزگاکانی سلێمانی وسەڵاحەددین دەستیگر کرد.

وێنە گەورەکە:  شانە نوستووەکانی ڕێکخراوی داعش لە چەند ناوچەیەكی عێراق ماون و مەترسییان لەسەر هێزە ئەمنییەکان و هاووڵاتیان دروستکردووە، هێزە ئەمنییەکانی عێراق و پێشمەرگە بە هاوکاریی هێزەکانی هاوپەیمانیی نێودەوڵەتی دژی داعش بەردەوام ئۆپەراسیۆنی سەربازی دژی چەکدارانی ئەو ڕێکخراوە ئەنجامدەدەن.

ڕاگەیێنراوی فەرمی: دەزگای دژەتیرۆری عێراق لە ڕاگەیێنراوێکدا ڕایگەیاند: بە پشتبەستن بە زانیاریی دروست و بە هاوکاری لەگەڵ بەڕێوەبەرایەتی ئۆپەراسیۆنەکانی دەزگای ئاسایشی هەرێمی کوردستان، دەزگای دژەتیرۆر توانی تیرۆریستێک لە پارێزگای سلێمانی دەستگیر بکات، کە پێگەیەکی گەورەی سەربازیی لە ویلایەتی فەلوجەی داعش هەبووە.

٠ دەزگاکە بە هەماهەنگی لەگەڵ دەزگای هەواڵگری و کاروباری فیدراڵی، توانی تیرۆریستێک لە پارێزگای سەڵاحەددین دەستگیربکات، ئەویش پێگەیەکی سەربازیی لە ویلایەتی کەرکوکی ئەو ڕێکخراوە هەبووە.

ئەوەی پێویستە بیزانیت: لە 14ـی ئەم مانگە، سەرۆکوەزیرانی عێراق ڕایەگەیاند: دەزگای هەواڵگیریی نیشتیمانی بە هاوکاری و هەماهەنگیی فەرماندەیی ئۆپەراسیۆنە هاوبەشەکان، ئەنجوومەنی ئاسایشی هەرێمی کوردستان و هێزەکانی هاوپەیمانی نێودەوڵەتی توانیان عەبدوڵڵا مەکی موسڵیح ڕەفیعی ناسراو بە "ئەبو خەدیجە" بکوژن کە جێگری خەلیفەی ڕێکخراوی داعش بوو.