ئەڵمانیا و فەرەنسا و بەریتانیا داوای گەڕانەوە بۆ ئاگربەستی غەززە دەکەن

ئاڤا نیوز

 

وەزیرانی دەرەوەی ئەڵمانیا و فەڕەنسا و بەریتانیا داوای گەڕانەوەی دەستبەجێیان بۆ ئاگربەست غەززە کرد. 

 

وێنە گەورەکە:  لە حەوتی ئۆکتۆبەری ساڵی 2023 شەڕ لە کەرتی غەززە هەڵگیرساوە و بەهۆی هێرشە بەردەوامەکانی ئیسرائیلیش لەوکاتەوە تاوەکو ئێستا زیاتر لە 48 هەزار کەس کوژراون و زیاتر لە 111 هەزار کەسی دیکەش برینداربوون. دواتر لە 19-1-2025 ئاگربەست لەنێوان ئیسرائیل  و حەماس کەوتە بواری جێبەجێکردنەوە، بڕیاربوو ڕێککەوتنە سێ قۆناغ لەخۆبگرێت و هەر قۆناغێکیش 42 ڕۆژ بخایەنێت. 

 

زانیاریی زیاتر: ئەم هەڵوێستەی ئەم وڵاتانە لە دوای ئەوە دێت کە سوپای ئیسرائیل دەستبەرداری ئاگربەستەکەی 19ی کانوونی دووەم بووە، هێرشەکانی بۆ سەر کەرتی غەززە دەستپێکردوونەتەوە و سەدان کەسی لەو کەرتە کوشتووە.

 

ڕاگەیێنراویی فەرمی: لە بەیاننامەیەکی هاوبەشی وەزیرانی ئەو سێ وڵاتانەدا داوا کراوە ئیسرائیل پابەندی یاسا نێودەوڵەتییەکان بێت و ڕێزیان لێ بگرێت و ڕێگە بە چوونەژوورەوەی یارمەتییە مرۆییەکان بۆ کەرتی غەززە بدات. 

- ئەوەش هاتووە کە "دەستپێکردنەوەی هێرشەکانی ئیسرائیل لە غەززە، پاشەکشەیەکی گەورەیە بۆ خەڵکی غەززە. ئێمە بە قوربانییە مەدەنییەکان شۆک بووین و بە پەلە داوای گەڕانەوەیەکی دەستبەجێ بۆ ئاگربەست دەکەین."

لەلایەکی دیکەوە: پێشتر ئیسرائیل کاتز، وەزیری بەرگریی ئیسرائیل، ڕایگەیاندبوو ئەگەر حەماس بارمتەکان ئازاد نەکات، ئەوا سوپای ئیسرائیل بەشێکی زیاتری کەرتی غەززە داگیر دەکات و دەیخاتە سەر خاکی ئیسرائیل.