شەرع داوای ڕادەستکردنەوەی ئەسەد لە پووتین دەکات

ئاڤا نیوز

 

سەرۆککۆماری سووریا بۆ قۆناغی ڕاگوزەر بە فەرمی داوایەکی پێشکەش بە هاوتا ڕووسییەکەی کردووە سەبارەت بە ڕادەستکردنەوەی بەشار ئەسەد بە مەبەستی دادگاییکردنی لە خاکی سووریا.

 

وێنە گەورەکە: دوای تێپەڕبوونی نیو سەدە لە حکومڕانی بنەماڵەی ئەسەد و 13 ساڵ بەسەر خۆپێشاندانەکانی سووریا، بەرەبەیانی ڕۆژی یەکشەممە 2024-12-08، ئۆپۆزیسیۆنی ئەو وڵاتە، دیمەشقی پایتەختی کۆنترۆڵ کرد و بەشار ئەسەد، سەرۆکی وڵاتەکە بەرەو ڕووسیا هەڵات.

 

زانیاریی بەدەستهاتوو: بەگوێرەی چەند سەرچاوەیەک کە قسەیان بۆ ماڵپەڕی "عەرەبییە" و "حەدەس" کردووە، ئەحمەد شەرع، سەرۆککۆماری سووریا بۆ قۆناغی ڕاگوزەر، داوایەکی فەرمی پێشکەش بە ڤلادیمیر پووتین، سەرۆکی ڕووسیا کردووە تاوەکو بەشار ئەسەدی ڕادەست بکاتەوە بۆ ئەوەی لە خاکی سووریا دادگایی بکرێت.

 

لەلایەکی دیکە: سەرەتای ئەم مانگە ئاژانسی ڕۆیتەرز لەسەر زاری چەند سەرچاوەکی دیپلۆماسییەوە بڵاویکردەوە کە شەرع داوای گەڕاندنەوەی ئەو پارانەی لە ڕووسیا کردووە کە لەلایەن بەشار ئەسەدەوە لە مۆسکۆ نێردراون.

 

ئەوەی لەوبارەیەوە دەگوترێت: سەبارەت بە ئەگەری ڕادەستکردنەوەی بەشار ئەسەد لەلایەن مۆسکۆوە بە دیمەشق، ئاژانسی ڕۆیتەرز لە زاری سەرچاوەیەکی ڕووسیەوە ئەوەی بڵاوکردبووەوە کە ڕووسیا ڕازی نابێت بە ڕادەستکردنەوەی ئەسەد.

ئەوەی پێویستە بیزانیت: پێشتر لەمیانی سەردانێکی شاندی ڕووسیا بۆ دیمەشق کاربەدەستانی سووریا پرسی گەڕانەوەی ئەسەدیان بۆ سووریا تاوتوێ کردووە. بەگوێرەی یەکێک لە سەرچاوەکان، کاربەدەستانی سووریا لە کۆبوونەوەیەکی سێ کاتژمێریان لەگەڵ میخائیل بۆگدانۆڤ، جێگری وەزیری دەرەوەی ڕووسیا باسیان لەوە کردووە کە گەڕانەوەی ئەسەد بەربەستێکی گەورە نییە لەبەردەم بوونیادنانەوەی پەیوەندییەکانیان.