ئەمریکا بۆ "وەبەرهێنانی زیاتر" فشار لە وڵاتێکی کەنداو دەکات

ئاڤا نیوز

 

وەزیری بازرگانی ئەمریکا دەڵێت، وڵاتەکەی 100 ملیار دۆلاری بۆ ئازادکردنی کوەیت خەرجکردووە، بەڵام ئەو وڵاتە زۆرترین باجی لەسەر کاڵای ئەمریکی داناوە، مامۆستایەکی زانکۆی کوەیتیش دەڵێت، ئیدارەی ترەمپ فشار لە وڵاتەکەی دەکات تا وەبەرهێنانی زیاتر لە بازاڕی ئەمریکادا بکات.

 

وێنە گەورەکە: سندوقی سەروەری کوەیت کە سەرمایەکەی زیاتر لە ترلیۆنێک دۆلارە، بەوتەی بەرپرسانی کوەیت 50%ی پڕۆژە و وەبەرهێنانی سندووقەکە لە ئەمریکا دایە و دواتریش ئەوروپا و بەریتانیا و وڵاتانی ئاسیا.

 

لێدوانی فەرمی: هوارد لوتنیک، وەزیری بازرگانی ئەمریکا لە چاوپێککەوتنێکدا دەڵێت، هەرچەندە وڵاتەکەی لە پرۆسەی ئازادکردنی کوەیتدا لە ساڵی 1991، زیاتر لە 100 ملیار دۆلاری خەرجکرد، بەڵام ئەو وڵاتە ئێستا بەرزترین باجی خستووەتەسەر کاڵای ئەمریکی و ئیدارەی ترەمپیش دەیەوێت ئەو جۆرە مامەڵەیە ڕابگیرێت.

 

لەلایەکی دیکەوە: د.عەبدوڵڵا شایجی، سەرۆکی پێشووی کۆلێژی زانستە سیاسییەکان لە زانکۆی کوەیت و پسپۆڕی کاروباری ئەمریکا دەڵێت، خودی بەڵگەنامەکانی ئەمریکا دەیسەلمێنن کە کوەیت، سعودییە، ئیمارات، ژاپۆن و کۆریای باشووری تێچووی تەواوی ئازادکردنی کوەیتیان لە ئەستۆ گرتووە، بابەتی باجیش وڵاتانی کەنداو یەک سیاسەتی باجی هاوبەشیان هەیە کە ئەویش بریتییە لە 5%.

 

بەوتەی ئەو مامۆستایەی زانکۆ، ئامانج لەو هەڵمەتەی بەرپرسانی ئیدارەی ئەمریکا بۆ ئەوەیە فشار لە کوەیت بکەن لە ڕێگەی سندووقە سەروەرییەکەی وەبەرهێنانی زیاتر لە ئەمریکادا بکات، تەنانەت فشارکردن لە کوەیتیش تا پەیوەندییەکانی لەگەڵ ئیسرائیل ئاسایی بکاتەوە دەکرێت ئامانجێکی دیکەی ئەو بێزارکردنە بێت.