بەهۆی دواخستنی مووچە بەڕێوەبەری بانکێک لە سلێمانی دوور دەخرێتەوە

ئاڤا نیوز

 

بەهۆی دواخستنی مووچەی خانەنشینانی پێشمەرگە و هێزەکانی 70 بەڕێوەبەری بانکی باخان لەسلێمانی لە کارەکەی دوور دەخرێتەوە. 

 

چیرۆکی سەرەکی: بەگوێرەی خشتەی دابەشکردنی مووچەی وەزارەتی دارایی و ئابووری، دەبوایە ڕۆژی 17مانگی سێ، مووچەی خانەنشینانی پێشمەرگە لە سەرتاسەری هەرێمی کوردستان دابەش بکرایە، بەڵام لە سنووری پارێزگاکانی سلێمانی و هەڵەبجە و ئیدارە سەربەخۆکانی گەرمیان و ڕاپەڕین چەند ڕۆژێک دواکەوت، بۆنموونە ئەمڕۆ یەکشەممە کە 23ی مانگ بوو و پشوو بوو، بانکی کێوەڕەش لە ئیدارەی سەربەخۆی ڕاپەڕین مووچەی خانەنشینانی پێشمەرگە و هێزەکانی 70ی دابەش کرد.

 

هۆکارە زانراوەکان: ئاڤا بەدواداچوونی بۆ هۆکاری دواکەوتنی دابەشکردنی مووچە لە سنووری سلێمانی کردووە کە بەمشێوەیەیە:- 

- لە ڕاگەیێنراوێکی بانکی کێوەڕەشدا هاتووە، بەشێکی بانکەکان زۆر قەرەباڵغن بۆیە ناتوانن لە یەک کات مووچەی هەموومان دابەش بکەن، دەیکەنە سەرە و هەر ڕۆژە و بەشێکیان. 

- سەرچاوەیەک لە وەزارەتی دارایی و ئابووریی هەرێمی کوردستان بە ئاڤای ڕاگەیاندووە، بەشێکی زۆری کێشەکە لە بانکی باخان بووە لە سلێمانی، بەهۆیەوە ئاکۆ عومەر، بەڕێوەبەری بانکەکە دوورخراوەتەوە.

لێدوانی فەرمی: هەر لەبارەی دوورخستنەوەی لە پۆستەکەی، ئاکۆ عومەر، بەڕێوبەری بانقی باخان لەسلێمانی بە ئاڤای ڕاگەیاند، هیچ نووسراوێکی لەسەر دوورخستنەوەی و کۆتاییهاتنی ڕاژەکەی وەک بەڕێوبەری بانک پێنەگەیشتووە، تەنها بە زارەکی لە وەزارەتی داراییەوە بڕیاری دوورخستنەوەی پێ گوتراوە.

- لە وەزارەت پێیان وتم بۆیە لە ئەرکەکەت دوور دەخرێیتەوە، کتابی خەرجکردنی مووچەت بۆ خانەنشینانی پێشمەرگە واژۆنەکردووە، بەڵام گرفتەکە لای من نەبوو.