دوای هەشت هەفتە دانیشتنەکانی پەرلەمانی عێراق دەستپێدەکاتەوە

ئاڤا نیوز

 

دوای هەشت هەفتە لە پەککەوتنی دانیشتنەکان بەهۆی بایکۆتی بەشێک لە فراکسیۆنەکانی شیعە، ئەمشەو دوای بەربانگی ئێوارە بڕیارە پەرلەمانی عێراق کۆببێتەوە و خوێندنەوەی یەکەم بۆ پڕۆژەیاسای نوێی دەستەی حەشدی شەعبی بکات، ئەو پڕۆژەیەش هاوکاتە لەگەڵ داواکارییە نێودەوڵەتییەکان بۆ هەڵوەشاندنەوەی ئەو دامەزراوەیە و تێکەڵکردنی بە وەزارەتەکانی ناوخۆ و بەرگری.

 

ئەوەی پێویستە بیزانیت: حەشدی شەعبی دامەزراوەیەکی سەربازیی عێراقە و ئەندامەکانی لە پێکهاتەی شیعەن، سەرەتا وەک هێزێکی خۆبەخش بۆ شەڕی دژی داعش دروستبوون، بەڵام دواتر لە پەرلەمانی عێراق یاسای بۆ دەرچوو و ئێستا ئەو هێزە نزیکەی 4.5 ترلیۆن دیناری لە بودجەی گشتی بۆ دیاریکراوە و زیاتر لە 238 هەزار چەکداریشی هەیە.

 

لێدوانی فەرمی: سەگڤان یوسف، جێگری سەرۆکی لیژنەی ئاسایش و بەرگریی لە پەرلەمانی عێراق بە ئاڤا میدیای ڕاگەیاند، هەرچەندە لە کۆبوونەوەکەی ئەمشەودا خوێندنەوەی یەکەم بۆ پڕۆژەیاسای دەستەی حەشدی شەعبی دەکرێت، بەڵام بەهۆی ناڕەزایی سوننەکان و بەشێک لە شیعەکان، ئاسان نییە نیسابی یاسایی بۆ کۆبوونەوە ئامادە بێت بۆیە ئەوانیش تا کاتژمێر 8ی شەو چاوەڕێ دەبن تا بزانن نیساب دەبێت یان نا.

 

زانیاریی زیاتر: لای خۆیەوە شیروان دووبەردانی، ئەندامی فراکسیۆنی پارتی لە پەرلەمانی عێراق بە ئاڤا میدیای ڕاگەیاند، ئەمشەو کۆبوونەوەی پەرلەمان دەکرێت و خوێندنەوەی یەکەمیش بۆ پڕۆژەیاسای دەستەی حەشدی شەعبی دەکرێت، هاوکات بڕیارە بڕگەکانی دیکەش دانیشتنەکەش خوێندنەوەیان بۆ بکرێت و پەسەند بکرێن.

 

پێدراوە ڕاستەکان: پڕۆژەیاسای دەستەی حەشدی شەعبی لە 18 ماددە پێکهاتووە و لە ماددەی دووەمیدا دەڵێت، حەشدی شەعبی بەشێکە لە هێزە چەکدارەکانی عێراق و پەیوەست دەکرێت بە فەرماندەی گشتی هێزە چەکدارەکانەوە، ئەرکیشی بریتیی دەبێت لە پاراستنی ژیانی دەستووریی و دیموکراسیی عێراق و بەرگریکردن لە وڵات و پاراستنی یەکێتییەکەی، لەگەڵ ڕووبەڕووبوونەوەی تیرۆر.

 

بەشێکی دیکە لە گرنگترین خاڵەکانی ناو ڕەشنووسی پڕۆژەیاسایی نوێی دەستەی حەشدی شەعبی:

-قەدەغەیە ئەندامانی دەستەی حەشدی شەعبی کار و چالاکی سیاسی بکەن و ببنە ئەندام لە حیزبەکان، هاوکات قەدەغەشە ببنە ئەندام لە ڕێکخراوی چەکداریی.

-حەشدی شەعبی بە فەرمانی فەرماندەی گشتی هێزە چەکدارەکان ئۆپەراسیۆنی سەربازیی ئەنجام دەدات و هەماهەنگیشی لەگەڵ دامەزراوە ئەمنییەکانی دیکە دەبێت.

-دەستەی حەشدی شەعبی لە سەرۆک و 16 بەڕێوەبەرایەتیی پێکدێت.

-دەبێت سەرۆکی دەستەکە خاوەن ئەزموون و پسپۆڕی بێت و لانیکەم بڕوانامەی بەکالۆریۆسی هەبێت.

-دەستەی حەشدی شەعبی ئەکادیمیای سەربازیی تایبەت بە خۆی دەبێت و بڕوانامەی بەکالۆریۆس لە زانستی سەربازیی بە دەرچووانی ئەکادیمیاکە دەدات.

-دیوانی چاودێریی دارایی عێراق وردبینی بۆ خەرجییەکانی دەستەکە دەکات.

-بە پەسەندکردنی ئەم یاسایە، یاسای حەشدی شەعبی ژمارە (40)ی ساڵی 2016 هەڵدەوەشێتەوە.