ئەم مانگە گۆڕانکاری لە دابەشکردنی مووچە دەکرێت

ئاڤا نیوز

 

وەزارەتی دارایی عێراق ڕەزامەندی لەسەر ناردنی مووچەی مانگی سێی مووچەخۆران بۆ هەرێمی کوردستان دەربڕی و بەگوێرەی زانیارییەکانی ئاڤا ئەم مانگە دابەشکردنی مووچەی مانگی سێ گۆڕانکاری تیادا دەکرێت.

وێنە گەورەکە: ئەمڕۆ سێشەممە، وەزارەتی دارایی عێراق ڕەزامەندی دا لەسەر ناردنی 954  ملیار و 880 ملیۆن دینار بۆ مووچەی فەرمانبەرانی هەرێمی کوردستان، پێشبینی دەکرێت سبەی پارەی مووچەی مانگی سێ بخرێتە سەر هەژماری بانکیی وەزارەتی دارایی کوردستان، دوای ئەوەش لیستی مووچەی مانگی سێ بڵاودەکرێتەوە، بۆ ئەوەی پێش جەژنی ڕەمەزان دەست بە دابەشکردنی بکرێت.

 

ڕاگەیێنراوی فەرمی: وەزارەتی دارایی کوردستان ڕایگەیاند، بڕی 954  ملیار و 880 ملیۆن دینار دەنێردرێت و سبەی چوارشەممە دەخرێتە سەر هەژماری هەرێمی کوردستان لە لقی هەولێری بانکی ناوەندی.

 

زانیاریی ئاڤا: سەرچاوەیەک لە وەزارەتی دارایی و ئابووری هەرێمی کوردستان بە ئاڤای ڕاگەیاند، لیستەکە هاوشێوەی مانگی ڕابردوو دەبێت، بەڵام خێراتر دەکرێت و ڕۆژانی دابەشکردن کەم دەکرێتەوە.

 

ئەوەی پێشبینی دەکرێت: ئاڤا زانیویەتی دابەشکردنی مووچە، ئەم مانگە جیاواز دەبێت و خێرا دەکرێت بە جۆرێک هەوڵ دەدرێت تا جەژن سەرجەم مووچەخۆران مووچەیان پێ بدرێت؛ یەکشەممە یان دووشەممەی هەفتەی داهاتوو جەژنە، ڕۆژانی هەینی و شەممەش کە پشووە دابەشکردنی مووچە بەردەوام دەبێت بۆ هەموو مووچەخۆران.

 

ئەمەش بزانە: دوای چەندین ساڵ یەکەمجارە حکومەتی عێراق پێش ئەوەی مانگ تەواو بێت پارە بنێرێت و مووچە دابەش بکرێت. 

 

لەلایەکی دیکە: ئەوانەی 'هەژماری من'ـیان هەیە و کارتەکانیان چالاکە "ئەکتیڤە" کە ژمارەیان زیاتر لە 330 هەزار کەسە، سبەی لە بانکی ناوەندییەوە پارە بۆ بانکەکانی بەشدار لە هەژماری من دەنێردرێ و هەر سبەی شەو زۆربەیان دەتوانن لە ئامێرەکانی پارە مووچەکەیان ڕابکێشن.