هیومان رایتس وۆچ داوای هەموارکردنەوەی دەستووری کاتی سووریا دەکات

ئاڤا نیوز

ڕێکخراوی چاودێریی مافەکانی مرۆڤ (هیومان رایتس وۆچ) دەڵێت، دەستووری کاتی سووریا ڕۆڵی دەسەڵاتی دادوەریی وڵاتەکە کەمدەکاتەوە و دەسەڵات لەدەستی دەزگای جێبەجێکردن کۆدەکاتەوە، بۆیەش داوای هەموارکردنەوەی دەستوورەکە دەکات.

چیرۆکی سەرەکی: 13ـی ئاداری ئەمساڵ ئەحمەد شەرع، سەرۆککۆماری سووریا بۆ قۆناغی ڕاگوزەر دەستووری کاتی وڵاتەکەی پەسەندکرد کە بۆ پێنج ساڵ کاری پێدەکرێت.

ڕاگەیێنراوی فەرمی: هیومان رایتس وۆچ لە ڕاگەیێنراوێکدا ئاماژەی بەوەكردووە، دەستوورەکە مافی دامەزراندنی ئەندامانی دەزگای یاسادانان و دادوەریی بە سەرۆکی وڵات بەخشیووە بەبێ هیچ ڕێکار و چاودێرییەک، دەسەڵاتە زۆرەکانی سەرۆکیش "نیگەرانی گەورە لەسەر بەردەوامی حوکمی یاسا و پاراستنی مافەکانی مرۆڤ دروستدەکات".

بەشێکی دیکە لە ڕاپۆرتەکەی هیومان رایتس وۆچ:

٠ دەبێت قۆناغی ڕاگوزەر سەرەتای هەنگاونان بێت بۆ سیستمی حکومڕانی کە ڕێز لە مافەکان بگرێت نەک بیانخاتە مەترسییەوە، هیچ پاساوێکیش بۆ بەهێزکردنی سیستمی تاکڕەوی نییە.

٠ داوا لە دیمەشق دەکەین پێداچوونەوە بە دەستوورە کاتییەکە بکات، بە جۆرێک گەرەنتی بەهێزی پاراستنی سەربەخۆیی دەسەڵاتەکانی دادوەریی و یاسادانان بکات.

٠ هەمواری دەستوورەکە ببێتە هۆی گەرەنتی زیاتری ڕێزگرتن لە مافەکانی مرۆڤ و لێپرسینەوە لەوانەی پێشێلکارییان کردووە.