ئەردۆغان: ئیمامئۆغلو کتێبی درۆ و گەندەڵی نووسیوە

ئاڤا نیوز

ڕەجەب تەیب ئەردۆغان، سەرۆککۆماری کۆماری تورکیا لە کاردانەوەی خۆپیشاندانەکانی جەهەپە و لایەنگرانی لە دژی دەستگیرکردنی سەرۆک شارەوانییەکەیان دەڵێت: کردەوە قێزەونەکانیان دەرکەوت، ڕووی ئەوەیان نابێت سەیری خزمەکانیان بکەن نەک  گەل، سەرۆکی گەورەشارەوانی ئیستەنبووڵ لەگەڵ هەندێک لە شارەوانی شارۆچکەکان کتێبی گەندەڵی و دزی و بەرتیل وەرگرتنیان نووسیوە".

چیرۆکی سەرەکی: ماوەی شەش ڕۆژە، خۆپیشاندان و گرژی و ناڕەزایەتی لە شارەکانی ئیستەنبووڵ، ئەنقەرە و ئیزمیری بەردەوامە، ئەمەش دوای ئەوەی ئەکرەم ئیمامئۆغلو، سەرۆکی گەورە شارەوانی ئیستەنبووڵ لەگەڵ 100 کەسی دیکە، بە فەرمانی دادگا دەستگیرکران.

لێدوانی فەرمی: ڕەجەب تەیب ئەردۆغان، سەرۆککۆماری تورکیا لە کۆبوونەوەی فراکسیۆنی ئاکپارتی لە پەرلەمانی تورکیا بە تووندی هێرشی کرد سەر جەهەپە، ڕایگەیاند: هەرگیز ئەوانەمان لەبیرنەکردووە و ناکەین کە بە ڕێگای ناشەرعی هەوڵی شکستپێهێنانمان دەدەن، ئەوانەی ئەوەندە بێ ئومێدبوون وڵات و گەل دەخەنە ئاگرەوە.

ئۆزێل وەک سەرۆکی جەهەپە هەڵسوکەوت ناکات، بەڵکو وەک مایەپووچێکی سیاسیی کە تەماح و ترسەکان مێشکیان دیل کردووە هەڵسوکەوت دەکات"، "بەداخەوە نەیتوانیوە ئازاد بێت، نەیتوانیوە لەژێر فەرمانی ئەو بازنەیە دەربچێت کە بەهۆی کورسیەکەیەوە قەرزداریانە".

پشتیوانیکردنی سەرۆکی گشتیی جەهەپە بۆ ئەو بێ بنەچانەی بەرد دەگرنە پۆلیس، بە تەور هێرشیان دەکەنە سەرو بێڕێزی بەمزگەوتەکانمان دەکەن، وەک گەلەکەمان ئێمەش ئازار دەدات.

جەردەکان بەربوونەتە یەکتری و هاوبەشانی تاوان یەکتریان فرۆشتووە و چوون بۆ لای پۆلیس و دادگا ڕاپۆرتیان داوە. لە ئێستادا شایەتحاڵی بوومەلەرزەی ناوخۆی پارتەکەین.

لە لایەکی دیکەوە: یڵماز تونج، وەزیری دادی تورکیا ڕایگەیاند، لە نێوان 1500خۆپیشاندەر کە تۆمەتبارن بە گێرەشێوێنی 200ـیان دەستگیرکراون.