لە شارەزوور دوو ڕاوچی دەستگیر دەکرێن

 

ئاڤا نیوز

بەڕێوەبەرایەتی پۆلیسی دارستان و ژینگەی پارێزگای سلێمانی، دەستگیرکردنی دوو ڕاوچی لە کاتی ڕاوە ماسی دا ڕاگەیاند.

بڵاوکردنەوەی فەرمی: بەڕێوەبەرایەتی پۆلیسی دارستان و ژینگەی پارێزگای سلێمانی، ڕایگەیاند: دوو ڕاوچی لە کاتی ڕاوە ماسی لە دەریاچەی دەربەندیخان، لەلایەن بەشی پۆلیسی دارستان و ژینگەی شارەزوور لەگەڵ بنکەی زەڕایەن دەستگیرکران.

زانیاریی زیاتر: لەمیانی بەدواداچوونەکەدا پێنج تۆڕ و ئۆتۆمبێلێک و مۆلیدەیەک دەستیبەسەردا گیراوە، پەڕاوی لێکۆڵینەوە بۆ دوو ڕاوچییەکە کراوەتەوە، هەروەها ڕێکاری یاساییان لەلایەن دادوەری لێکۆڵینەوەوە بەرامبەر دەگیرێتەبەر.

باکگراوند: ساڵانە لە 10ـی ئازار تاوەکو 20ـی حوزەیران، لە هەرێمی کوردستان ڕاوە ماسی قەدەغە دەکرێت، چونکە لەم سێ مانگەدا ماسی گەرا دادەنێت، ئەم بڕیارەش لەپێناو پارێزگاریکردن لە مانەوە و زیادبوونی ماسی لە ڕووبارەکان دەدرێت.