سیپان شێروانی: وەزارەتی دارایی بێدەنگی لە گەندەڵییەكانی بانكە حكومییەكان دەكات

ئاڤا نیوز

 

ئەندامێكی ئەنجوومەنی نوێنەرانی عێراق ئاشكرای دەكات، وەزارەتی دارایی فیدڕاڵی و بانكە حكومییەكان شكستیان هێناوە لە پاراستنی سامانی گشتی و لەماوەی 9 ساڵدا، ملیارەها دۆلار ون بووە.

 

لێدوانی فەرمی: سیپان شێروانی، ئەندامی ئەنجوومەنی نوێنەرانی عێراق تایبەت بە ئاڤا ڕایگەیاند، بانكی ڕافیدەین ماوەی 9 ساڵە وردبینی بۆ نەكراوە، بانكی بازرگانی عێراقیش بەهەمان شێوە 4 ساڵە حیساب و چەكی خەرجكردنی پارەی ڕوون نییە، بەهۆیەوە ملیارەها دۆلار كە پارەی هاووڵاتیانە لە قەرزە شكستخواردووەكاندا ون بووە.

 

بابەتە ستراتیژییەكە: وەزارەتی دارایی فیدڕاڵی بەردەوام ئەو بانكانە لە لێكۆڵینەوە دەپارێزێت و ڕێگە نادات وردبینی بۆ خەرجی كاش و چەكی و قەرزە شكستخواردووەكانیان بكرێت.

 

چی ڕوودەدات: ئەو پەرلەمانتارە پاڵپشت بە ماددەی 15ـی یاسای ئەنجوومەنی نوێنەرانی عێراق، تەواوی بەڵگە پێویستەكانی ئاڕاستەی داواكاری گشتی، دەستەی دەستپاكی، دیوانی چاودێری دارایی و دادگا كردووە، بەمەبەستی گرتنەبەری ڕێكاری پێویست لەدژی هەموو ئەو كەسانەی كە بەرپەرسن لە ئەنجامدان و پەردەپۆشكردنی ئەو گەندەڵییە گەورەیە. 

 

خاڵە ئەرێنییەكان: لیژنەیەكی پەرلەمانی لەهەوڵدان دەیان ملیار دۆلاری ونبووی بانکە حکومیەکان بگەڕێننەوە، بەو پێیەی هاووڵاتیان شایەنی ئەوەن لەبارەی شەفافیەتیی سامانی گشتیی وڵات ئاگاداری تەواویان هەبێت.