ئەردۆغان داوای چەکدانانی پەکەکە و یەپەگە دەکات

ئاڤا نیوز

 

ڕەجەب تەییب ئەردوغان، سەرۆککۆماری تورکیا، بەبۆنەی جەژنی ڕەمەزانەوە وتارێکی پێشکەش کرد و تیایدا داوای کرد پەکەکە و یەپەگە چەکەکانیان دابنێن و خۆیان هەڵوەشێننەوە.

 

وێنە گەورەکە: لە 27ــی شووبات چوارەم قۆناغی ئاشتی لە تورکیا دەستیپێکرد، عەبدوڵڵا ئۆجەلان، ڕێبەری پەکەکە پەیامە مێژووییەکەی بڵاوکردەوە و داوای کرد، پەکەکە خۆی هەڵبووەشێنێتەوە، چونکە بەشێک لەو ئامانجانەی بەدیهێناوە کە خەباتی بۆ دەکرد، دوا بەدوای ئەو پەیامە کاردانەوەی ناوخۆی جیهانی بەدواداهات و زۆرینەی لایەنەکان پێشوازیان لێکرد  و بەهەنگاوێکی گرنگ بۆ بەرقەرارکردنی ئاشتی لە تورکیا لێکیان دایەوە. 

لێدوانی فەرمی: ئەردۆغان لە وتارەکەیدا ڕایگەیاند، تورکیا ڕیگە بە زیانگەیاندن بە یەکپارچەیی خاکی سووریا و نائارامکردنی سنوورەکانی باشووری نادات و لە کارکردن لە سەر نەخشەڕێگای ئامانجی 'تورکیای بێ تیرۆریزم' بەردەوامە.

- باسی لەوەشکرد، چاوەڕێی ئەوەن کە پەکەکە و یەپەگە خۆیان هەڵوەشێننەوە و چەکەکانیان بە تەواوی دابنێن و لەوەش زیاتر بابەتەکە دوا نەخەن؛ ئەو هۆشداری دا لەوەی دانبەخۆداگرتنی تورکیا سنووری هەیە.

 

لەلایەکی دیکەوە: پێشتریش وەزیری بەرگری تورکیا جەختی لەوە کردبووەوە کە "تورکیا لەگەڵ پەکەکە بەهیچ شێوەیەک ئاگربەست قبووڵ ناکات و دەبێت دەستبەجێ چەکەکانیان ڕادەست بکەنەوە، پێویست ناکات چیتر وشەی ئاگربەست لە لێدوانەکانیان بەکاربهێنن".