عێراق و هەرێمی کوردستان بە جیا پەنا بۆ بەکارهێنانی بارانی دەستکرد دەبەن

 

ئاڤا نیوز

عێراق هەوڵەکانی خێرا کردووە بۆ ئەوەی ڕوو لە بارانی دەستکرد بکات و ئەزموونێکی 30 ساڵە تاقیبکاتەوە، کە ئێستا بەهۆی وشکەساڵییەوە ناڵێنێت و ناچارە هەوری دەستکرد بۆ باران بارین بەکاربهێنێت.

چیرۆکی سەرەکی: لە ساڵی 2022ـەوە و ماوەی سێ ساڵە بە دوای یەک عێراق بە دەست وشکەساڵییەوە دەناڵێنێت. بەهۆیەوە زیانی گەورە بە ڕووبەڕی کشتوکاڵی کەوتووە و بە تایبەت لە ئەمساڵدا ڕێژەی باران بارین لە تەواوی عێراق بە ڕێژەیەکی بەرچاو کەمی کردووە.

لێدوانی فەرمی: د. کاروان سەباح هەورامی، بەڕێوەبەری گشتیی سەرچاوەکانی ئاو لە وەزارەتی کشتوکاڵ و سەرچاوەکانی ئاو تایبەت بە ئاڤا میدیا ڕایگەیاند، بۆ سوود وەرگرتن لە تەکنیکی بارانی دەستکرد توێژینەوە کراوە و لەگەڵ چەند کۆمپانیایەکی بیانی گفتوگۆیان کردووە. هاوکات چەند ئۆفەرێکیش پێشکەش بە هەرێمی کوردستان کراوە.

بابەتی بارانی دەستکرد لە عێراق بابەتێکی جیاوازە و پەیوەندیدارە بە بەغدا و هەماهەنگیان لەگەڵ هەرێمی کوردستان نییە و بە فەرمی ئاگادار نەکراونەتەوە.

لە لایەکی دیکەوە: جاسم فەلاحی، بریکاری وەزیری ژینگەی عێراق ئاشکرای دەکات، عێراق رژدە لەسەر بەکارهێنانی بارانی دەستکرد، بەڵام ئەو بابەتە تێچووی زۆر و پێویستی بە خەمڵاندنی زیاترە بۆیە چاوەڕوانی ڕاپۆرتی کەڵکی ئابووری دەکەن. 

 

زانیاریی زیاتر: بۆ بەکارهێنانی پڕۆژەی بارانی دەستکرد، تیمی زانستی عێراق لەگەڵ کۆمپانیای تایبەتمەندی ئوستراڵی و ئەڵمانی کۆبوونەوەیان کردووە و دەستەی کەشوهەوای عێراق دەڵێت ئەو پڕۆژەیە لە قۆناغی توێژینەوەدایە و پێویستی بە بودجە و فڕۆکەی چاودێری و  تایبەت بۆ دروستکردنی هەوری دەستکرد هەیە.

ئەوەی پێویستە بیزانیت: ئەو تەکنیکە بریتییە لە کوتانی هەورەکان بە ماددەی کیمیایی ئایۆدیدی زیو AgI، تاوەکو هەورەکان گەشە بکەن و توانای دابارینی بارانیان هەبێت. بەڵام ئەوەی پێویستە ڕێژەی شێ لە هەوای ناوچەکەدا سەدا 40 بێت. بۆیە هەمیشە سەرکەوتن بەدەست ناهێنێت. هاوکات تێچووی ماددیشی زۆرە، بۆ نموونە کوتانی یەک هەور پێویستی بە 200 دۆلار، کە نزیکەی نیو ملیۆن لیتر دەبارێنێت کە یەکسانە بە 500 مەتر سێجا.