ترەمپ باجی گومرگی بەسەر دەیان وڵات سەپاند

ئاڤا نیوز

 

دۆناڵد ترەمپ، سەرۆکی ئەمریکا زنجیرەیەک باجی نوێی  بەسەر دەیان وڵاتی جیهان سەپاند و بە تەواوەتی جەنگی ئابووری لە دژی وڵاتانی جیهان ڕاگەیاند. ترەمپ لەوبارەیەوە دەڵێت، ڕۆژی ئازادیی ئەمریکایە.

 

وێنە گەورەکە: بە سەپاندنی باجی زیاتر لەسەر بەرهەمی هاوردەکراوی وڵاتان بۆ ئەمریکا، ترەمپ ڕوویەکی نوێی مامەڵەی ئابووری لەگەڵ دۆست و دوژمنانی وڵاتەکەی ئاشکرا کرد و دەڵێت، "دەیانەوێت بەرهەمی ناوخۆیی زیاد بکەن و چەندین ساڵە وڵاتەکەی تاڵان دەکرێت، چییان بەرامبەر بکرێت بە هەمان شێوە وەڵامیان دەبێت".

 

لێدوانی فەرمی: دۆناڵد ترەمپ، سەرۆکی ئەمریکا ڕایگەیاند، بە ڕێژەی 25% باجی زیاتر بەسەر ئۆتۆمبێلی هاوردەکراوی وڵاتانی جیهان دەسەپێنین و هەلی کار و ژمارەی کارگەکان لە ئەمریکا زیاد دەکەین بەجۆرێک بەتەواوی پشت بە خۆمان دەبەستین.

ئەوەی پێویستە بیزانیت: بەشێکی دیکە لە وتەکانی ترەمپ دوای سەپاندنی باجی گومرگی لەسەر کاڵای وڵاتان:

 

-سەپاندنی باجی گومرگی بەرهەمی ناوخۆی ئەمریکا زیاددەکات و وادەکات ڕێژەی وەبەرهێنان لە وڵاتەکەیان زیادبکات.

-  باجی زیادە بە ڕێژەی 34% بەسەر بەرهەمی چین و 20% بەسەر بەرهەمی یەکێتیی ئەوروپا دەسەپێنین.

- ناتوانین بەوجۆرە بەردەوام بین کە ماوەی 50 ساڵی ڕابردوودا لە کەرتی ئابووری کارمان کردووە و بەکارهێنراوین.

 

لەلایەکی دیکە:  ئەم هەنگاوانەی ترەمپ لەکاتێکدایە وڵاتانی چین و کەنەدا و تەنانەت یەکێتی ئەوروپاش هۆشدارییان داوەتە ترەمپ، لە جەنگی ئابووریدا هیچ لایەنێک براوە نابێت و زیانەکان دوولایەنە دەبن، ئەمەش کاریگەری نەرێنی توندی لەسەر ئابووری جیهان دەبێت.