ڕووسیا ئامادەیی بۆ نێوەندگیری لە نێوان ئەمریکا و ئێران دەردەبڕێت

ئاڤا نیوز

 

وەزارەتی دەرەوەی ڕووسیا ئامادەیی خۆی بۆ پێشکەشکردنی هەر هەنگاو و دەستپێشخەرییەک بۆ ئەنجامدانی ڕێککەوتن لە نێوان ئەمریکا و ئێران دەردەبڕێت.

 

وێنە گەورەکە: دوای تەشەنەسەندنی گرژییەکانی نێوان تاران و واشنتن و هەڕەشەی دۆناڵد ترەمپ، سەرۆکی ئەمریکا بۆ ئەنجامدانی هێرشی سەربازی بۆ سەر خاکی ئێران لە ئەگەری ئامادەنەبوونی بۆ دانوستان و گفتوگۆ لەسەر بەرنامە ئەتۆمیەکەی، سێرگی ڕیابکۆڤ، جێگری وەزیری دەرەوەی ڕووسیا هۆشداری تووند دەدات لە ئەگەری بەردوامی ناکۆکیەکان و بە مەترسیەکی گەورە بۆ ئاسایشی جیهان ناوزەندی دەکات، هەروەها ئامادەیی مۆسکۆ بۆ دەستپێشخەری و نێوەندگیری لە نێوان تاران و واشنتن دەردەبڕێت.

 

لێدوانی فەرمی: سێرگی ڕیابکۆڤ، جێگری وەزیری دەرەوەی ڕووسیا ڕایگەیاند: ”لە ئێستادا پەیوەندییەکانی نێوان مۆسکۆ و واشنتن بەرەو ئاسایبوونەوە و نەمانی گرژی و ناکۆکیەکان دەڕوات و هەنگاوی باشمان بڕیووە و ئامادەی گفتوگۆ و دانوستاندنی زیاترین لەسەر پرسە ناکۆکەکانی نێوان هەردوو وڵات و بە ئاراستەی بەهێزکردنی پەیوەندییەکان هەنگاو دەنێین."

 

زانیاریی زیاتر: سێرگی ڕیابکۆڤ، جێگری وەزیری دەرەوەی ڕووسیا سەبارەت بە گرژییەکانی نێوان ئەمریکا و ئێران، نیگەرانی ڕووسیای دەربڕی و  هۆشداری لە تەشەنەسەندنی گرژی و ناکۆکیەکانی نێوان هەردوو وڵات دا و ڕایگەیاند: "مۆسکۆ ئامادەیە بۆ پێشکەشکردنی هەر هاوکارییەکی دۆستانە بۆ لێکنزیکردنەوە و نێوەندگیری بۆ ئاسایکردنەوەی پەیوەندییەکان و گەشتن بە ڕێککەوتن لە نێوان ئەمریکا و ئێران، نابێت ڕێگە بدرێت دۆخەکە لەمە زیاتر خراپ ببێت."