زانیاریی نەبیستراو لەبارەی سووتانی کۆگاکەی هەولێر

ئاڤا نیوز

 

ئاسایشی هەولێر ئاشکرای کرد هۆکاری سووتانی کۆگاکەی هەولێر شۆرتی کارەبا نەبووە، بەڵکو کەسێک بەمەبەست سووتاندوویەتی، ئاڤا نیوز بۆ یەکەمجار زانیاریی نەبیستراو لەبارەی تۆمەتبارەکە ئاشکرا دەکات.

 

چیرۆکی سەرەکی: ساڵی ڕابردوو سێ کەس کە دووانیان بران، عەرەبن و خەڵکی شاری مووسڵن، ئەوەی دیکەیان کوردە، تۆمەتبار کران بە بردنی 200 هەزار دۆلار (20 دەفتەر دۆلار) لەو کۆگایەی ڕۆژی شەممە 09-03-2024 سووتێنرا. 

 

ئەوەی پێویستە بیزانیت: ئەو دوو برایە بەڕێوەبەری فرۆشتن بوون لە کۆگاکەی ناوچەی پیشەسازیی باکووری هەولێر، تۆمەتبارەکەی دیکەش کارمەند بووە لە کۆگاکە. 

 

لێدوانی فەرمی: ئەفسەرێک لە ئاسایشی هەولێر زانیارییەکانی بۆ ئاڤا پشتڕاست کردەوە و ڕایگەیاند: هۆکاری سووتاندنی کۆگاکە بۆ کێشەیەکی کۆن دەگەڕێتەوە، کە دوو کوڕی تۆمەتباری سووتاندنی کۆگاکە پێشووتر لەلایەن هێزە ئەمنییەکان بەهۆی بردنی پارە لە کۆگاکە دەستگیرکراون. 

 

زانیاریی زیاتر: بڕیار بووە ڕۆژی یەکشەممە 10-03-2024 ئەو تۆمەتبارانەی بەرپرس بوون لە بردنی ئەو بڕە پارەیە لە کۆگاکە، دادگەیی بکرێن، لەکاتێکدا چەندجارێک داوا لە تۆمەتباری سووتاندنی کۆگاکە کراوە لە دەرەوەی دادگە ڕێکبکەون، بەڵام ڕەتی کردووەتەوە. 

 

سەیر و سەمەرە: ئەو تۆمەتبارەی دوێنێ کۆگاکەی سووتاند، دوای سووتاندنی لەگەڵ خەڵک بەشدار دەبێت لە کوژاندنەوەی ئاگرەکە، بۆ ئەوەی گومانی لێنەکرێت.