كەشناسی: ئەمڕۆ باران بە لێزمە دەبارێت و پلەكانی گەرماش پێنج پلە دادەبەزن

ئاڤا نیوز

 

بەڕێوەبەرایەتیی كەشناسیی هەرێمی كوردستان ئاشكرای دەكات ئەمڕۆ ئاسمان بە گشتی هەوری باراناوی دەبێت و لە هەندێك ناوچە باران بە لێزمە دەبارێت.

 

ڕاگەیێنراوی فەرمی: بەڕێوەبەرایەتیی كەشناسی و بوومەلەرزەزانی ڕایگەیاند: ئەمڕۆ شەممە ئاسمان بە گشتی هەوری باراناوی دەبێت لە زۆربەی ناوچەكان، لە هەندێ کات و شوێن دابارین بە شێوەی لێزمەباران و هەورەبروسكەیشی لەگەڵدا دەبێت، لە درەنگانی شەودا کەش سەقامگیر دەبێت  و کاریگەریی ئەم شەپۆلە کۆتایی دێت.

 

لێدوانی فەرمی: شێخ دارا، پێشكەشكاری كەشناسیی ئاڤا میدیا ڕایگەیاند: ڕۆژی شەممە بارانی بەلێزمە چەند ناوچەیەكی هەرێمی كوردستان دەگرێتەوە و هەورە بروسكەی لەگەڵدا دەبێت و ئەگەری دروستبوونی لافاو لە چەند شوێنێك هەیە و لە هەندێك ناوچەش تەرزە دەبارێت.

 

زانیاریی زیاتر: ئەمڕۆ پلەكانی گەرما نزیكەی پێنج پلەی سیلیزی بەراورد بە تۆمارەكانی دوێنێ نزم دەبنەوە.

 

لەلایەكی دیكەوە: كەشناسیی هەرێمی كوردستان پێشبینی دەكات سبەی ئاسمانی هەرێمی كوردستان ساماڵ بۆ نیمچە هەور بێت و پلەكانی گەرما بەراورد بە ئەمڕۆ دوو پلە بەرزتر بن.