جارێکی دیکە دەرگای خۆپاڵاوتن بۆ سەرۆکی ئه‌نجوومه‌نی نوێنه‌رانی عێراق دەکرێتەوە

ئاڤا نیوز

ئەنجوومەنی نوێنەرانی عێراق بە هەموارکردنەوەی پەیڕەوی ناوخۆی، دەیەوێت دەرچەیەک بۆ چارەسەرکردنی کێشەی هەڵبژاردنی سەرۆکەکەی بدۆزێتەوە و جارێکی دیکە دەرگای خۆپاڵاوتن بکاتەوە.

وێنە گەورەکە: دوای دوورخستنەوەی محەممەد حەلبووسی له‌ مانگی 11ی ساڵی 2023 ەوە ئه‌نجوومه‌نی نوێنه‌ران عێراق بێ سەرۆکە،  پۆستەکە بەرکەوتەی پێکهاتەی سوننەیە و تاوەكو ئێستاش لایەنەکان له‌سه‌ر كاندیده‌كانیان ناكۆكن و ئاماده‌نین سازش بۆ یه‌كتر بکەن.

چی ڕوودەدات: لە کۆبوونەوەی دوێنێی ئەنجوومەنی نوێنەران بە زۆرینەی ده‌نگ بڕگەیەک بۆ دانیشتنی ئەمڕۆ زیادکرا له‌باره‌ی هەموارکردنەوەی په‌یڕه‌وی ناوخۆ. هەموارەکە دەرچەیەک بۆ چارەسەرکردنی کێشەکە دەکاتەوە، دەرگای خۆپاڵاوتن سەرلەنوێ دەکرێتەوە بۆ ئەوەی لایه‌نه‌ سوننه‌كان بتوانن کاندیدەکانیان بگۆڕن. 

لێدوان فه‌رمی: د. سەباح سوبحی، ئەندامی ئه‌نجوومه‌نی نوێنه‌رانی عێراق به‌ ئاڤا نیوزی گوت: هەموارکردنەوەی پەیڕەوی ناوخۆ بۆ ئەوەیە سەرۆکی ئه‌نجوومه‌ن بە زۆرینەی ڕەها هەڵبژێردرێت و کۆتایی بەو گرێکوێرەیە بهێنرێت.

بۆچی گرنگه‌:  دوای هەڵبژاردنی سەرۆک، ئەنجوومەنی نوێنەرانی عێراق ڕاسته‌خۆ گفتوگۆ لەبارەی هه‌ردوو پرۆژەیاسای بودجه‌ی 2024 و پرۆژەیاسای نه‌وت گاز  دەکات کە پەیوەندیدارن بە هەرێمی کوردستانەوە.

باکگراوند: پرسی هەڵبژاردنی سەرۆکی ئەنجووومەنی نوێنەرانی عێراق لە گەڕی دووەم پەکخرا، کاتێک هەردوو بەربژێر شه‌علان كرەیم (لەلایەن محه‌ممه‌د حه‌لبووسی، سەرۆکی هاوپەیمانیی ته‌قه‌دووم پشگیری دەکرێت )و سالم عیساوی (لەلایەن خه‌میس خه‌نجه‌ر، سه‌رۆكی هاوپه‌یمانیی سیاده‌ پشتگیری دەکرێت) بۆ گەڕی دووەم مانەوە و تاوەکو ئێستاش دانیشتنەکە نەکراوە.