وەزیری بازرگانی تورکیا: باجە گومرگییەکانی ترەمپ تەپ و تۆزی لە بازاڕە داراییەکان دروست کردووە

ئاڤا نیوز

عومەر بۆڵات، وەزیری بازرگانی تورکیا لە  میانی بەشداریکردنی لە لووتکەی وەبەر‌هێنان لە ئەبوزەبی لەسەر پەیوەندییەکانی نێوان عێراق و تورکیا، پڕۆژەی ڕێگەی گەشەپێدان و باجە گورمگییەکانی ترەمپ بۆ سەر وڵاتانی قسەی بۆ د. مستەفا، نێردراوی ئاڤا میدیا کرد.  

 

لێدوانی تایبەت: وەزیری بازرگانی تورکیا گوتی، عێراق لەنێو وڵاتە ئیسلامییەکاندا، گەورەترین هاوبەشی بازرگانی تورکیایە و دراوسێ و  هاوبەشێکی باشی وڵاتەکەمانە، کارکردنی بۆ بەرزکردنەوەی قەبارەی بازرگانی نێوانمان بەردەوامە، سوپاس بۆ خوا پەیوەندییەکانمان  لە سەرجەم سێکتەرەکانی وەبەرهێنان،ئابووری، کولتووری و سیاسیدا زۆر باش دەڕوات.  

 

لەلایەکی دیکەوە: عومەر بۆڵات. سەربارەت بە کارکردن لە پڕۆژەی ڕێگەی گەشەپێدان و گرنگییە ئابوورییەکەی گوتی: چوار وڵات، تورکیا و عێراق، قەتەڕ و ئیماڕاتی عەرەبی، یاداشتنامەیەکی لێکتێگەیشتنیان واژۆ کردووە.

 

-  وەزیرانی گواستنەوە و گەیاندنی هەرچوار وڵات کار لەسەر بناغەی پرۆژەکە و دابینکردنی پێداویستییەکان دەکەن.

 

زانیاریی زیاتر: وەزیری بازرگانی تورکیا باجە گومرگییەکەی ترەمپ بە تەپ و تۆزێکی کاتی بازاڕە داراییەکان وەسف دەکات و دەڵێت: ئامانجی سەرەکی ترەمپ لەو بڕیارە، پاراستن و پشتیوانیکردنە لە بەرهەمە ناوخۆییی و پیشەسازییەکانی وڵاتەکەی، بەم بڕیارە  نیگەرانییەک لە بازاڕە بازرگانییەکانی جیهان دروست بوو.

زانیاریی بەدەستهاتوو: ئاڤا زانیویەتی، وەزیری بازرگانی تورکیا لەداهاتوویەکی نزیکدا سەردانی هەرێمی کوردستان دەکات.