د.ڕێبەر تەحسین: هەرێمی کوردستان ڕووبەڕووی وشکەساڵی شوێنی بووەتەوە

ئاڤا نیوز

 

پسپۆڕێکی جیۆلۆجیای ژینگەیی دەڵێت: ئەگەرچی شارەکانی هەرێمی کوردستان دۆخیان لە شارەکانی ناوەڕاست و خوارووی عێراق باشترە، بەڵام بەشێک لە شارەکان ڕووبەڕووی وشکەساڵی شوێنی بوونەتەوە.

 

وێنە گەورەکە: وشکەساڵی دوو جۆری هەیە، وشکەساڵی شوێنی تەنیا چەند پارێزگا یان شوێنێک دەگرێتەوە، لە شارێک وشکەساڵییە، بەڵام لە شارێکی دیکە وشکەساڵی نییە. جۆرێکی دیکەی وشکەساڵی هەرێمییە، مەبەست لێی سەرتاپا وڵات یان هەرێمەکان دەگرێتەوە.

 

لێدوانی فەرمی: د.ڕێبەر تەحسین، مامۆستای زانکۆ و پسپۆڕ لە جیۆلۆجیای ژینگەیی بە ئاڤا میدیای وت، ئەمساڵ وەک یەکێک لە خراپترین ساڵەکانی وشکەساڵی لە مێژووی داتاکانی دابارین لەسەر ئاستی عێراق و هەرێمی کوردستان دادەنرێت. لە ڕووی زانستییەوە ئەگەر لە 400 ملیم کەمتر ببارێت ئەوا بە وشکەساڵی دادەنرێت. هەرێمی کوردستان حاڵی لە شارەکانی دیکەی عێراق باشترە. لەسەر ئاستی هەرێمی کوردستانیش پارێزگای سلێمانی و هەڵەبجە حاڵیان لە هەموو پارێزگاکانی دیکە باشترە.

 

ژمارەکان وا دەڵێن: ئەو پسپۆڕەی جیۆلۆجیای ژینگەیی پشتبەستوو بە کۆمەڵێک داتا کە لە مانگی دەستکرد و بنکەکانی کۆکردنەوەی داتای دابارین وەرگیراون ڕایدەگەیێنێت، ئەمساڵ بەشێک لە پارێزگاکانی هەرێمی کوردستان ڕووبەڕووی وشکەساڵی شوێنی بوونەتەوە. داتاکانی ئەمساڵ بەمجۆرەن:

لە سەنتەری پارێزگای هەولێر 113 ملیم باران باریووە
لە سەنتەری پارێزگای سلێمانی 320 ملیم باران باریووە
لە سەنتەری پارێزگای دهۆک 125 ملیم باران باریووە
لە سەنتەری پارێزگای هەڵەبجە 383 ملیم باران باریووە
لە سەنتەری پارێزگای کەرکووک 142 ملیم باران باریووە

 

د.ڕێبەر تەحسین ئەوەش دەڵێت: ساڵی پار لە قەزای چۆمان هەزار و 560 ملیم باران باریبوو، بەڵام ئەمساڵ تەنیا 300 ملیم باران باریووە. ئەم وشکەساڵییەی ڕوو لە ناوچەکە کردووە چارەسەرەکەی تەنیا بە پەیڕەکردنی Smart Agericalcher کشتوکاڵی زیرەک دەبێت، کە پشتبەستوو بە مانگی دەستکرد دەتوانرێت بزانرێت پارچەیەک زەوی چەند ئاوی پێویستە.