خۆپیشاندانەکەی زیقار توندووتیژیی تێکەوت و 42 کەس برینداربوون

ئاڤا نیوز

لە خۆپیشاندانەکەی ئەمڕۆی مامۆستایان و فەرمانبەرانی پەروەردە لە پارێزگای زیقاری باشووری عێراق، هێزە ئەمنییەکان ویستیان بەهێز بڵاوە بە خۆپیشاندانەکە بکەن، بۆ ئەو مەبەستەش توندووتیژییان بەکارهێنا، لە ئەنجامیشدا 42 کەس برینداربوون.

ئەوەی پێویستە بیزانیت: ماوەی سێ ڕۆژە لە پارێزگاکانی عێراق مامۆستایان بایکۆتی دەوامیان کردبوو و داوای دابەشکردنی زەویی و زیادکردنی مووچەکانیان دەکرد، ئەمڕۆش حکومەتی عێراق بڕیاریدا زەوی بۆ مامۆستا و فەرمانبەرانی پەروەردە تەرخان بکرێت و قەرزیی بانکییان بە سودی کەمتر لە 2% پێبدرێت.

زانیاریی بەدەستهاتوو: سەرچاوەیەکی ئاگادار لە پارێزگای زیقار بە ئاڤا میدیای ڕاگەیاند، لە ئەنجامی پێکدادانەکانی ئەمڕۆی نێوان مامۆستایان و فەرمانبەرانی پەروەردە و هێزە ئەمنییەکان، 42 کەس برینداربوون، لەوانەش 27یان خۆپیشاندەر و 15ی دیکەش لە هێزە ئەمنییەکان بوون.

بینراو و بیستراو: هێزە ئەمنییەکان بەشێوەیەکی توندوتیژی ڕووبەڕووی مانگرتووان بوونەوە و دار و غازی فرمێسکڕێژییان بۆ بڵاوەپێکردنی خۆپیشاندەران بەکارهێنا، هاوکات ئەندامێکی ئەنجوومەنی پارێزگای زیقاریش بەناوی سەلام فەیاز لەناو خۆپیشاندەرانەوە دەستگیرکرا، پەروەردەی پارێزگاکەش توندوتیژییەکانی سەرکۆنە کرد و داوای لێپرسینەوەی لەوانە کرد کە هێرشیانکردەسەر مامۆستایان.

لەلایەکی دیکەوە: هەرچەندە وابڵاوکرایەوە کە لە خۆپیشاندانەکەی شاری ناسرییەی ناوەندی پارێزگای زیقار هاووڵاتییەک بەناوی عادل عجیل بەهۆی گرژییەکانەوە گیانی لەدەستداوە، بەڵام ئەو هاووڵاتییە لە فەیسبووکەوە هەواڵی مردنی ڕەتکردەوە و ڕایگەیاند، "نەمردووم و سوپاس بۆ خوا ساغ و سەلامەتم".

ڕاگەیێنراوی فەرمی: ئەنجوومەنی پارێزگای زیقار لە ڕاگەیێنراوێکدا سەرکۆنەی گرژییەکانی کرد کە بەرامبەر مامۆستایان کران و داوای لە هەموان کرد دان بە خۆیاندا بگرن و خۆیان لە زیاتر گرژکردنی دۆخەکە بپارێزن.