لەسەر داواکاری مامۆستایان پەرلەمانی عێراق کۆبووەوە

ئاڤا نیوز

لەسەر ڕاسپاردەی لیژنەی پەروەردە، پەرلەمانی عێراق کۆبوونەوەیەکی نائاسایی ئەنجامدا و چەند پێشنیازێک خرایەڕوو،  هاوکات داوای دورخستنەوەی بەڕێوەبەری پۆلیسی زیقار لەپۆستەکەی دەکرێت.

وێنە گەورەکە: ماوەی چەند ڕۆژێکە مامۆستایانی عێراق بایکۆتی هۆڵەکانی خوێندنیان کردووە و داوای زیادکردنی مووچە، دابینکردنی یەکەی نیشتەجێ بوون، زیادکردنی دەرماڵەی پیشەیی و خێزان و منداڵ و چەند داواکارییەکی دیکە دەکەن، هاوکات فەرمانبەرانی وەزارەتی پەروەردەش هاتنە پاڵیان.

لێدوانی فەرمی: فیراس موسەلەماوی، پەرلەمانتاری عێراق ڕایگەیاند: لە دانیشتنی نائاسایی ئەمڕۆی ئەنجوومەنی نوێنەرانی عێراق، لیژنەی پەروەردە چەند پێشنیاز و ڕاسپاردەیەکی پێشکەش بە سەرۆکایەتی پەرلەمان کرد، سەرۆکایەتی پەرلەمانیش بەڵێنیدا ڕاسپاردەکان وەک خۆی ڕەوانەی ئەنجوومەنی وەزیران  بکات.

ئەوەی پێویستە بیزانیت: گرنگترین پێشنیازەکانی لیژنەی پەروەردە لە پەرلەمانی عێراق بریتین لە زیادکردنی مووچەی بنەڕەتی بۆ مامۆستایان بەڕێژەی 100% و زیادکردنی دەرماڵەی پیشەیی لە 150 هەزار دینارەوە بۆ 300 هەزار دینار.

لەلایەکی دیکەوە: ئەمڕۆ پێنجشەممە 10-4-2025 واژۆی 54 پەرلەمانتار کۆکرایەوە بۆ دوورخستنەوەی بەرپرسی پۆلیسی زیقار لەپۆستەکەی بەهۆی دەستدرێژیکردنە سەر مامۆستایان و کارمەندانی پەروەردە لەکاتی ناڕەزایەتییەکان، سەرۆکایەتی ئەنجوومەنی نوێنەرانیش داواکارییەکەی ئاراستەی لیژنەی ئاسایش و بەرگری پەرلەمان کرد.