پێشمەرگە لە چیای قەرەچووغ هێرش دەكاتە سەر داعش

ئاڤا نیوز

هێزی پێشمەرگەی كوردستان لە ئۆپەراسیۆنێكدا بەهاوبەشی لەگەڵ هێزەكانی هاوپەیمانان لەچیای قەرەچووغ هێرشیان كردە سەر مۆڵگەیەكی تیرۆرستان و دەستیان بەسەر ژمارەیەك كەلوپەلی لۆجستی چەكدارانی داعشدا گرت.

لێدوانی فەرمی: سیروان بارزانی، فەرماندەی میحوەری مەخموور-گوێڕی هێزەكانی پێشمەرگە ڕایگەیاند، ئەمڕۆ هەینی 10-4-2025، ئۆپەراسیۆنێکی هاوبەشی پێشمەرگەی میحوەری 6 لەگەڵ تیمی هاوپەیمانان (مارساک)ی ئەمریکا لە چیای قەرەچووغ ئەنجام درا و تێیدا چەندین مۆڵگەی تیرۆریستانی داعش لەناوبران و دەست بەسەر کەلوپەلی تیرۆریستاندا گیرا.

ئەوەی پێویستە بیزانیت: دوای ڕووداوەكانی شازدەی ئۆكتۆبەری ساڵی 2017 و كشانەوەی هێزەكانی پێشمەرگە لە ناوچە كوردستانییەكانی دەرەوەی ئیدارەی هەرێمی كوردستان، بۆشایی ئەمنی لەو ناوچانە دروستبوو، بۆیە پاشماوەكانی ڕێكخراوی تیرۆرستی داعش كەڵكیان لەو كەلێنە وەرگرت و جموجۆڵی تیرۆرستی خۆیان ڕێكخستەوە و چەندین شانەی نووستوویان پێكهێنا، دواتر هێزەكانی پێشمەرگە گەڕانەوە بەشێك لەو ناوچانە و بەهاوكاری هاوپەیمانیی نێودەوڵەتی و هێزە ئەمنییەكانی عێراق، توانرا جووڵەی تیرۆرستان لەو ناوچانە كۆنترۆڵ بكرێت، بەڵام تائێستا بنبڕ نەكراوە.