ڕاوێژکارێکی سوودانی: سەردانەکەی سوودانی کاریگەری لەسەر دەستپێکردنەوەی هەناردەی نەوت دەبێت

ئاڤا نیوز

 

ڕاوێژکاری ئابووریی سەرۆکوەزیرانی عێراق ڕایگەیاند، سەردانەکەی ئەمڕۆی سوودانی بۆ هەرێمی کوردستان، "بەدڵنیاییەوە کاریگەری لەسەر دەستپێکردنەوەی هەناردەی نەوتی هەرێمی کوردستان" و چارەسەرکردنی کێشەکانی بەردەم ئەم دۆسیەیە دەبێت.

 

ئەوەی پێویستە بیزانیت: پێشنیوەڕۆی ئەمڕۆ 12-4-2025، محەممەد شیاع سوودانی، سەرۆكوەزیرانی عێراق گەیشتە شاری هەولێر و لە فڕۆكەخانەی نێودەوڵەتیی هەولێر لەلایەن سەرۆكوەزیران مەسرور بارزانییەوە پێشوازیی لێ كرا.

 

لێدوانی فەرمی: مەزهەر محەممەد ساڵح، ڕاوێژکاری ئابووری سەرۆکوەزیرانی عێراق بە ئاڤا میدیای ڕایگەیاند، بەدڵنیاییەوە سەردانەکەی سەرۆکوەزیرانی عێراق بۆ هەرێمی کوردستان کاریگەریی لەسەر دەستپێکردنەوەی هەناردەی نەوت دەبێت و ئەم پرسە قۆناغێکی باش دەباتە پێشەوە.