یەکەمین کۆنفرانسی ئافرەتان لە هەولێر بەڕێوەدەچێت

ئاڤا نیوز

لە ژێر ناونیشانی "بە تواناکانمان داهاتوو بوونیاد دەنێین" سبەی یەکشەممە یەکەمین کۆنفراسی ئافرەتان لەهۆڵی سەعد عەبدوڵڵا لەشاری هەولێر بەڕێوەدەچێت و بۆ ماوەی دوو ڕۆژ بەردەوام دەبێت.

وێنە گەورەکە: كۆنفرانسی ئافرەتانی كوردستان؛ دەرفەتێکی گونجاو و کەشێکی ئازاد دەڕەخسێنێت، سەکۆیەکە بۆ گفتوگۆکردن دەربارەی ڕۆڵ و كاریگەریی ئافرەتان له ناو ئۆرگان و ڕێكخستنەكانی پارتی دیموكراتی كوردستاندا.

زانیاریی بەدەستهاتوو: کۆنفرانسەکە بۆ ماوەی دوو ڕۆژ بەردەوام دەبێت، نیشاندانی دیکۆمێنتاری و نمایش کردنی توانا شاراوەکانی ئافرەتان لە پاڵ ئەوەشدا لەماوەی دوو ڕۆژدا پێنج پانێلی پەیوەست بە دۆخی ئافرەتان پێشکەش دەکرێن، لە ڕۆژی دووەم کە دەکاتە ڕۆژی دووشەممە، ڕاسپاردەکانی کۆنفرانس دەخرێنەڕوو و کۆنفرانسەکە تەواو دەبێت.

لێدوانی فەرمی: زیبا تەها، ئەندامی ڕێکخستنی کۆنفرانس بە ئاڤای گوت، 700 ئەندامی ئافرەت کە لەنێو ئۆرگانەکانی پارتی خزمەت دەکەن، لەو کۆنفرانسە بەشداری دەکەن.

ئامانجەکان چین: ئەم كۆنفرانسه له پێناو تێڕامان و شرۆڤەكردنی ئێستا و كاركردن بۆ دواڕۆژێكی باشتره، هەروەها جەختکردنە لەسەر ئەوەی ئەگەر ئافرەت و پیاو پێكەوه و هاوشان و پشتیوانی یەکتر بن، بە مسۆگەری بەرەو داهاتووێکی پێشکەوتوو هەنگاو دەنێین.