دەرئەنجامی لێکۆڵینەوە لە دۆسیەی گیانلەدەستدانی ئەندازیارەکەی عێراق ئاشکرا دەکرێت

ئاڤا نیوز

ئەو لیژنەیەی بۆ لێکۆڵینەوەو گەیشتن بە ڕاستی دۆسیەی گیانلەدەستدانی ئەندازیار بەشیر خالید پێکهێنرابوو، کۆتایی بەکارەکانی دەهێنێت و لە ڕێگەی ڕاپۆرتێکەوە دەرئەنجامەکەی ئاشکرا دەکات.

 

وێنە گەورەکە: ئەندازیارێکی عێراقی بە ناوی بەشیر خالید لە بەغدا لەگەڵ ئەفسەرێکی وەزارەتی ناوخۆی عێراق بە پلەی لیوا تووشی ناکۆکی ببوو و لە زیندان ئەشکەنجەیەکی زۆر درابوو، سەرلەبەیانی 7ـی نیسان لە نەخۆشخانەیەکی بەغدا گیانی لەدەستدا.

زانیاریی بەدەستهاتوو: بەگوێرەی سەرچاوەیەک لە لیژنە پەرلەمانییەکە کە قسەی بۆ میدیای عێراق کردووە ئاماژە بۆ ئەوە دەکات، کۆتا ڕاپۆرتی لیژنەکە دەخرێتە کارنامەی دانیشتنی سبەی دووشەممە و لەنێو دانیشتنی پەرلەمان دەخوێنرێتەوەو ئەنجامەکەی ئاشکرا دەکرێت.

کاریگەریی و لێکەوتەکان: پەیوەست بە "دۆسیەی گیانلەدەستدانی ئەندازیارەکە" پەرلەمانی عێراق لە کۆبوونەوەی ڕۆژی 10ـی نیسان داوای لە لیژنەی پەرلەمانی تایبەت بەو دۆسییەیە کرد میوانداریی بەرپرسانی ئەمنی پەیوەندیدار بە گیانلەدەستدانی ڕاگیراو بەشیر خالید بکەن و ڕاسپاردەی خۆیان بەرزبکەنەوە، تا پەرلەمان بڕیاری پێویستی لەبارەوە دەربکات.

لە لایەکی دیکەوە: لەسەر ئەم دۆسیەیە بە بڕياری سەرۆکوەزیرانی عێراق لیژنەیەک بە سەرۆکایەتی بریکاری وەزارەتی ناوخۆ بۆ کاروباری پۆلیس و بریکاری دەزگای ئاسایشی نیشتمانی و ئەفسەرێکی باڵای دەزگای هەواڵگری نیشتمانی عێراق پێکهێنراوە و بڕیارە دوای تەواوکردنی کارەکانیان ئەنجامەکەی بۆ ڕای گشتی ئاشکرا بکەن.