سوودانی بۆ یادی ئەنفال: سەردەمی تاریکی کۆتاییهات و ئێستا کاتی بوونیادنانەوەیە

ئاڤا نیوز

سەرۆکوەزیرانی عێراق لە ساڵیادی شاڵاوی بەدناوی ئەنفال دا، دروود بۆ گیانی پاکی شەهیدانی ئەنفالکراو دەنێرێت و ئاماژە بۆ ئەوە دەکات کە ئەو تاوانە دڕندانەیە ڕووخساری ناشیرین و ڕەگەزپەرستییانەی ڕژێمی لە دژی گەلەکەمان و هێزە نیشتیمانییەکان ئاشکرا کرد.

 

وێنە گەورەکە: ئەمڕۆ یادی 37 ساڵەی شاڵاوی بەدناوی ئەنفالە کە ڕژێمی بەعسی ڕووخاو دژ بە خەڵک و خاک و ژینگەی کوردستان ئەنجامیدا و لە زنجیرەیەک شاڵاوی یەک بەدوای یەکدا دەیان هەزار خەڵکی بێتاوانی کوردستانی ڕاپێچی بیابانەکانی باشوور و ناوەڕاستی عێراق کرد و لەگۆڕی بەکۆمەڵدا زیندەبەچاڵ و بێسەروشوێنی کردن.
 
پەیامی فەرمی: محەممەد شیاع سوودانی، سەرۆکوەزیرانی عێراق پەیامێکی بە زمانی کوردی بەو بۆنەیەوە بڵاوکردەوە و ڕایگەیاند: عێراقییەکان بە ئازارەوە تاوانی ڕژێمی لە ناوچوو لە (شاڵاوە بەدناوەکانی ئەنفال) و ئەو کۆمەڵکوژییە دڕندانەیەی کە 37 ساڵ لەمەوبەر دژ بە ڕۆڵەکانی گەلی کوردمان ئەنجامدرا بەبیر دێننەوە.
 
- ئەو تاوانە دڕندانەیە ڕووخساری ناشیرین و ڕەگەزپەرستییانەی ڕژێمی لە دژی گەلەکەمان و هێزە نیشتیمانییەکان ئاشکرا کرد.

 

- ئەمڕۆ برایەتی و پێکەوەژیانی ئاشتییانە بەسەر هەموو پاڵنەرەکانی ڕق و کینەدا سەردەکەون، کە بەعسی سەدامی هەوڵی چاندنی دەدا لە نێو چین و توێژە جیاوازەکانی گەلەکەمان بە پێکهاتە هەمەچەشنەکەیەوە.

 

- ستەمکاری لە تاریکی مێژوودا کۆتایی پێهات و عێراقییەکان پێکەوە بەردەوام بوون لە پرۆسەی بوونیادنان و گەشەپێدان و بەرزڕاگرتنی پێگەی عێراقێکی یەکگرتوو و ئارام و سەقامگیر.

 

- دروود بۆ گیانی پاکی شەهیدانی ئەنفال و هەموو شەهیدانی عێراق.