175 هەزار ئاوارەی سووری لە تورکیاوە گەڕاونەتەوە

ئاڤا نیوز

لە دوای ڕووخانی ڕژێمەکەی بەشار ئەسەدەوە، ژمارەیەکی زۆر لە سوورییەکان کە بە هۆی شەڕی ناوخۆوە ئاوارەی وڵاتانی دیکە بووبوون بۆ وڵاتەکەیان گەڕاونەتەوە. 

لێدوانی فەرمی: عەلی یەرلیکایا، وەزیری ناوخۆی تورکیا ڕایگەیاند، لە دوای کەوتنی ئەسەدەوە زیاتر لە 175 هەزار و 412 سووری لە نێوان 9-12-2024 تاوەکو 13-4-2025، "بە ویستی خۆیان" لە تورکیاوە بۆ وڵاتەکەی خۆیان گەڕاونەتەوە.

- نزیکەی دوو ملیۆن و 800 سووری هێشتا لە تورکیا ئاوارەن و حکومەت هیوادارە ژمارەیەکی زیاتریان بۆ سووریا بگەڕێنەوە.

زانیاریی زیاتر: بە گوێرەی داتاکانی ئاژانسی کۆچبەرانی نەتەوە یەکگرتووەکان (UNHCR)، لە دوای کەوتنی ئەسەدەوە نزیکەی 400 هەزار سووری لە وڵاتانی دراوسێی سووریاوە بۆ وڵاتەکەیان گەڕاونەتەوە و نزیکەی ملیۆنێک کەسیش کە لە ناوخۆی وڵات ئاوارە بووبوون بۆ ناوچەکانی خۆیان گەڕاونەتەوە.