36 پەرلەمانتاری جولەکە هۆشداری لە مەترسی ڕووخانی ئیسرائیل دەدەن

ئاڤا نیوز

دژی بەردوامی جەنگ و داگیرکردنی غەزە 36 پەرلەمانتاری جولەکەی پەرلەمانی بەریتانیا پەیامێکی ناڕەزایی ئاراستەی جیهان دەکەن و هۆشداریش لە ڕووخانی ئیسرائیل دەدەن.

وێنە گەورەکە: بەردەوامی جەنگ لە غەزە و سیاسەتی داگیرکارییانەی بنیامین ناتانیاهۆ، سەرۆکوەزیرانی ئیسرائیل ناڕەزایەتی گەورەی وڵاتانی عەرەبی و ڕۆژائاوای بەدوای خۆیدا هێناوە و داوای ڕاگەیاندنی بەپەلەی ئاگربەست و کردنەوەی دەروازەکانی چوونەژوورەوەی هاوکارییە مرۆییەکان دەکەن، لە ئێستاشدا گەورەترین لیستی جولەکەکان لە پەرلەمانی بەریتانیا پەیامێکی هۆشداری سەبارەت بە لەناوچوونی ئیسرائیل ئاراستەی جیهان دەکەن.

بڵاوکراوەی فەرمی: 36 پەرلەمانتاری جولەکەی پەرلەمانی بەریتانیا پەیامێکیان بڵاوکردەوە و ئیدانەی بەردەوامی جەنگ و هێرشکردنە سەر خەڵک و ناوچەکانی نیشتەجێبوونی غەزە دەکەن و ڕایانگەیاند، "ناکرێت بێدەنگ بین لە خوێنڕشتنی بێتاوانەکان و برسیکردن و بڕینی سەرچاوەکانی ژیان لە شارەکە و داوای دەستبەجێ کۆتایهێنان بە جەنگ و سیاسەتی کوشتنی خەڵکی غەزە دەکەین."

- پەرلەمانتارانی جولەکەی بەریتانیا لە پەیامەکەیاندا نەتانیاهۆ، سەرۆکوەزیرانی ئیسرائیل بە داگیرکەر و مەترسی گەورە بۆ سەر مانەوەی ئیسرائیل ناوزەند دەکەن، لە پەیامەکەدا هاتووە، "بنیامین نەتانیاهۆ بە بەردەوامیدان بە داگیرکارییەکانی مەترسی گەورە بۆ سەر ئەو ئیسرائیلە دروست دەکات کە زۆرمان خۆشدەوێت."