سەبارەت بە بڕی ئاوی نێو بەنداوەكانی كوردستان دڵنیایی دەدرێتە هاووڵاتیان

ئاڤا نیوز

سەبارەت بە ئەو بڕە ئاوەی كە لەنێو بەنداوە گەورە و بچووكەكانی هەرێمی كوردستان هەیە بەڕێوەبەری گشتیی بەنداوەكان دڵنیایی دەداتە هاووڵاتیان و دەڵێت، بەشی پێویستییەكان دەکات و بۆ هاوین و پایزی داهاتوو مسۆگەرە.

وێنە گەورەكە: لە هەرێمی كوردستان سێ بەنداوی سەرەكی و گەورە و چەند بەنداوێكی مامناوەند و بچووك هەن، ئەمە جگە لە چەند پۆندێك لە ناوچە جیاجیاكانی هەرێمی كوردستان كە لە ڕێگەیانەوە بڕی پێویست ئاو بۆ خواردنەوە و كشتوكاڵ هەڵدەگیرێت، هاوكات سوودیشیان بۆ بەرهەمهێنانی كارەبا لێ وەردەگیرێت، حكومەتی هەرێمی كوردستانیش لە پلانیدایە 12 بەنداوی دیكە دروست بكات.

لێدوانی فەرمی: ڕەحمان خانی، بەڕێوەبەری گشتیی بەنداوەكانی هەرێمی كوردستان بە ئاڤا میدیای ڕاگەیاند: ئەمساڵ ساڵێكی كەمباران بووە، تەنانەت بەراورد بە ساڵی ڕابردوو كەمتر لە %50 باران باریوە، ئەم بارانەی بەم دواییەش باریوە هێشتا وەك پێویست نییە، بەڵام ئەو بڕە بەفرەی كە باریوە وردە وردە دەتوێتەوە و دەبێتە ئاو و دەڕژێنە نێو بەنداوەكان.

- ئەو بەنداوانەی لە هەرێمی كوردستان هەن وەك پێویست ئاویان تێدایە، بەڵام بەراورد بە ساڵی ڕابردوو ناكرێن، چونكە بارانێكی زۆر باری تەنانەت لافاویش دروست بوو و ئاوێكی زۆر لە بەنداوەكان كۆبووەوە.

- بەنداوی دوكان و دەربەندیخان، دوو گرنگترین بەنداون لە هەرێمی كوردستان هەم بۆ دابینكردنی كارەبا هەم بۆ ئاوی خواردنەوە. هاوكات بۆ كشتوكاڵكاریش سوودی زۆریان هەیە و سوودەكەی بەر ناوچەكانی باشوور و ناوەڕاستی عێراقیش دەگات، دڵنایی دەدەمە هاووڵاتیان كە بۆ هاوین و پایزی داهاتوو ئەو دوو بەنداوە ئاوی پێویستیان تێدا مسۆگەرە.

-  بەنداوی دهۆكیش هەرچەندە بەراورد بە ساڵی ڕابردوو ئاوەكەی زۆر كەمترە و 80%ی ساڵی ڕابردوو ئاوی تێدایە، بەڵام بەشی پێویستییەكان دەكات، بەنداوە بچووكەكانیش هەندێكیان سەرڕێژ بوون ئەوانی دیكەش لە سەرووی 60% ئاویان تێدایە، دانیشتووانی هەموو ئەو ناوچانەی كە دەكەونە چواردەوری بەنداوە بچووكەكانیش دڵنیا دەكەینەوە كە ئاوی پێویستیان تێدایە و بەشی پێویستییەكانیان دەكات.