سوودانی بۆ کۆچی دوایی پاپا فرانسیس: هاوخەمی ئازارەکانی هەژاران و ستەملێکراوان بوو

ئاڤا نیوز

سەرۆکوەزیرانی عێراق بۆ کۆچی دوایی پاپای ڤاتیکان پەیامێکی بڵاوکردەوە و ڕایگەیاند، سەردانەکەی پاپا بۆ عێراق نوێنەرایەتی بناغەیەکی پراکتیکی و گرنگی کرد بۆ لێکنزیکبوونەوەی ئایینەکان و چەسپاندنی برایەتیی و خۆشەویستی لە نێوان هەموو باوەڕداران لە سەرانسەری جیهاندا.

 

چیرۆکی سەرەکی: ئەمڕۆ دووشەممە 21-4-2025، پاپا فرانسیس، پاپای ڤاتیکان دوای تووشبوونی بە نەخۆشی هەوکردنی سییەکان، لە تەمەنی 88 ساڵیدا کۆچی دوایی کرد.

ڕاگەیێنراوی فەرمی: سەرکوەزیرانی عێراق ڕایگەیاند: بە خەم و پەژاریەکی زۆرەوە هەواڵی کۆچی دوایی پاپا و سەرۆکی کڵێسای کاسۆلیکی، قەداسەتی پاپا فرانسیس"ـمان پێگەیشت، دوای تەمەنێکی زۆر لە خزمەتکردنی مرۆڤایەتی و قووڵکردنەوەی پەیوەندییەکانی نێوان گەلان و کارکردن بۆ بەرەوپێشبردنی ئاشتی و ئامانج و بەها کۆمەڵایەتی و ئەخلاقییە بەنرخەکان.

- لەم لەدەستدانە بە ئازارەدا هاوبەشی خەمی هەموو مەسیحییەکانین لە عێراق و جیهاندا، له‌ خوای مه‌زن داواکارین گیانی به‌ به‌زه‌یی و میهره‌بانیی خۆی شاد بکات.

- لەگەڵ کۆچی دوایی پاپا، سەردانە مێژووییەکەی چوار ساڵ لەمەوبەر بۆ عێراق و دیدارەکەی لەگەڵ مەرجەعى باڵا عەلی سیستانی لە نەجەف بەبیر دەهێنینەوە، ئەو سەردانە نوێنەرایەتی بناغەیەکی پراکتیکی و گرنگی کرد بۆ لێکنزیکبوونەوەی ئایینەکان و چەسپاندنی برایەتی و خۆشەویستی لە نێوان هەموو باوەڕداران لە سەرانسەری جیهاندا.

- دروود بۆ گیانی پاپا فرانسیس، کە بە هاوخەمی ئازارەکانی هەژاران و ستەملێکراوان لە سەرانسەری جیهاندا ناسرا، پرسە و سەرەخۆشی خۆمان ئاڕاستەی خۆشەویستان و شوێنکەوتووانی و هەموو ئەو کەسانە دەکەین، کە هەوڵدەدەن پەیامی چاکە و مرۆڤایەتی لە سەرانسەری جیهاندا بڵاو بکەنەوە.