بۆ دووربوون لە تای خوێنبەربوون پێویستە چی بکەین؟

ئاڤا نیوز

وەزارەتی تەندروستی حکومەتی هەرێمی کوردستان چەند ڕێنماییەک بۆ دووربوون لە نەخۆشیی تای خوێنبەربوون بڵاو دەکاتەوە.

وێنە گەورەکە: تای خوێنبەربوون ڤایرۆسێکە لەڕێگەی ئاژەڵەوە بۆ مرۆڤ دەگوازرێتەوە. ڤایرۆسەکە لە عێراق بڵاوبووەتەوە، وەزارەتی تەندروستی عێراق تووشبونی 19 کەسی لە هەفتەیەکدا بە تای خوێنبەربوون پشتڕاستکردووەتەوە، لەو ژمارەیەش دوو کەس گیانیان لەدەستداوە.

ڕاگەیێنراوی فەرمی: وەزارەتی تەندروستی کوردستان ڕایدەگەیێنێت: پێویستە لەکاتی سەربڕینی ئاژەڵ، ئەم ڕێنماییە زانستییانە جێبەجێ بکرێن.

یەکەم: سەربڕینی ئاژەڵ پێویستە لەو شوێنانە بێت کە ڕێگەپێدراون و پزیشکی ڤێتێرنەری سەرپەرشتیی دەکات.

دووەم: لەکاتی سەربڕینی ئاژەڵ و کەوڵکردن یان پارچەپارچەکردنی گۆشتەکەیدا، پێویستە جلوبەرگی خۆپارێزی وەك (دەستکێش، جزمە، سەدریەی پلاستیك، ماسکی دەمووچاو) بەکاربهێنرێن.

سێیەم: نابێت خەڵک یان خانەوادە لە چواردەوری سەربڕەکە (قەساب) کۆببنەوە، نابێت لەکاتی سەربڕینی ئاژەڵ و پارچەپارچە کردنی گۆشتەکەیدا هاوکاری کەسەکان بکەن.

چوارەم: بەبێ دەستکێش مامەڵەکردن لەگەڵ جەستەی ئاژەڵی سەربڕاو مەکە، دوای پۆشینی دەستکێش و کەلوپەلی خۆپارێزی گۆشتەکە پارچەپارچە بکە، پاشان دەستت بەباشی بشۆ.

پێنجەم: لابردنی پاشماوەی ئاژەڵە سەربڕاوەکان و دانانی لە کیسی داخراو و فڕێدانی بۆ شوێنی تایبەت.

شەشەم: بەکارهێنانی چەقۆ و تەختەی پارچەپارچەکردنی تایبەت بە گۆشت، شوشتن و پاککردنەوەی تەختە و چەقۆکان دوای بەکارهێنان.

حەوتەم: پاککردنەوەی ئەو شوێنەی ئاژەڵەکەی لێ سەردەبڕدرێت، بەتایبەت ئەو شوێنانەی خوێنی لێیە بەماددەی کلۆریین (بلیچ- موعجیزە).

هەشتەم: باشتر وايە دواى سەربڕينى ئاژەڵ، گۆشتەکە بۆ ماوەى نيو كاتژمێر لە پلەى چوار بۆ هەشت پلەى سەدى هەڵبگيرێت پاشان بەكاربهێنريت. بەڵام گۆشتی کوڵاو هیچ کێشەی نییە، سەلامەتە و نابێتە هۆی توشبوون بە نەخۆشی تای خوێنبەربوون .

نۆیەم: ئەگەر ئاژەڵ گەنە يان مێرووى ترى هەبوو، باشتر وايە نەيكڕيت يان سەري نەبڕێت.

ئەوەی پێویستە بیزانیت: ئەم نەخۆشییە لە نێوان ئاژەڵەکان دەگوازرێتەوە، لە ئاژەڵەکانیشەوە بۆ مرۆڤ، بەهۆی ئەو گەنە و مێرووانەی لەسەر لەشی ئاژەڵەکان دەژین، هەروەها بەهۆی خوێن و گۆشتی ئاژەڵەکەشەوە دەگوازرێتەوە.