دەم پارتی بۆ وەزیری داد: پێویستە گۆشەگیری سەر ئۆجەلان هەڵبگیرێت و زیندانیانی نەخۆش ئازاد بکرێن

ئاڤا نیوز

شاندی دەم پارتی لەگەڵ یەڵماز تونج، وەزیری دادی تورکیا کۆبووەوە، شاندەکە داوای هەڵگرتنی گۆشەگیری سەر ئۆجەلان و ئازادکردنی زیدانیانی نەخۆش، ڕێکخستنەوەی یاسای دژەتیرۆر لە پەرلەمانی تورکیا کردووە. وەزیری دادی تورکیاش سەرجەم داواکارییەکانی بە تێبینی نووسیوەتەوە و بە شاندەکەی گوتووە، کاری لەسەر دەکەین.

چیرۆکی سەرەکی: کۆبوونەوەی شاندی دەم پارتی و وەزیری دادی تورکیا لە کاتژمێر 10:30 دەستی پێکرد، گوڵستان کلچ، سەرۆکی فراکسیۆنی دەم پارتی لە پەرلەمان و سێزای تەمەلی، جێگری هاوسەرۆکی دەم پارتی و ئۆزتورک تورکدۆغان وتەبێژی دەستەی یاسا و مافی مرۆڤ، بەشداربوون. لەم کۆبوونەوەیەدا کە لە وەزارەتی داد بەڕێوە چوو، شاندەکە فایلێکیان بە تونچ داوە کە بۆچوون و پێشنیازەکانیان بۆ بەرەوپێشبردنی پڕۆسەی ئاشتی لە چوارچێوەی یاسایی دا تێدایە.

لێدوانی فەرمی: گوڵستان کڵچ، سەرۆکی فراکسۆنی دەم پارتی ڕایگەیاند: داوامان بۆ هەڵگرتنی گۆشەگیری سەر عەبدوڵڵا ئۆجەلان، ڕێبەری زیندانیکراوی پەکەکە کرد، ئەمەش بۆ ئەوەی ئۆجەلان بتوانێت زیاتر  کار لەسەر بەرەوپێشبرنی پرۆسەی ئاشتی بکات.

ڕێگە بدرێت جگە لە شاندی ئیمرالی، پەرلەمانتاری جیاواز، لایەنە سیاسییە جیاوازەکان، ڕۆشنبیران، نووسەران، ڕۆژنامەنووسان و دیسانەوە ئەو ڕۆشنبیر و نووسەر و ڕۆژنامەنووسانەی کە ئۆجەلان دەیویست لەگەڵیان کۆببێتەوە،  بچنە ئیمرالی و لەگەڵیدا کۆببنەوە.

دۆخی زیندانیانی نەخۆش، کە زۆر بێویژدانیی و نادادپەروەرییە نەخۆشەکان لە زیندان بن، ڕێکخستنەوەی یاسای لەسێدارەدان، ڕێکخستنەوەی یاسای دژەتیرۆر کە چەندین کەس بێ ئەوەی ئەندامی تیرۆر بن بە تیرۆرست تۆمەتبار کران، باس کراوە.

فایلێک کە پرسە سەرەکییەکانی تێدایە سەبارەت بەو پرۆسەیەی کە دوای بانگەوازەکەی ئۆجەلان لە 27ـی شووبات پەرەی سەندووە، پێشکەشی تونچ کراوە.

بۆچوونی لایەنی بەرامبەر: یەڵماز تونج، وەزیری دادی تورکیا گوتی، " سەبارەت بە زیندانیانی نەخۆش و سزادراوانی نەخۆش، گوێ لە هەموو ئەمانە دەگرین و هەڵسەنگاندنیان بۆ دەکەین. بێگومان ئامانجمان لێرە تورکیایەکی بێ تیرۆرە. ئێمە لە لێواری ڕزگاربوونداین لەم شتە، هەموو تورکیا دەیەوێت لە بەڵای تیرۆر ڕزگاری بێت".

ئەوەی پێویستە بیزانیت: بڕیاربوو ڕۆژی هەینی 2025-04-18 کاتژمێر 2ـی دوای نیوەڕۆ، شاندی ئیمرالی بە سەرۆکایەتیی سڕی سورەیا ئۆندەر و پەروین بوڵدان لەگەڵ یڵماز تونج، وەزیری داد کۆببنەوە، بەڵام بەهۆی تێکچوونی دۆخی تەندروستی ئۆندەر، کۆبوونەوەکە دواخرا.