ترەمپ: کریمیا دەبێت بە خاکی ڕووسیا و زیلێنسکیش واژۆی لەسەر دەکات

ئاڤا نیوز

 

دۆناڵد ترەمپ ڕایدەگەیەنێت لەپێناو ڕاگرتنی جەنگ و بەدیهێنانی ئاشتی دەبێت دوورگەی کریمیا بدرێت بە ڕووسیا و زیلینیسکیش ئەوە پەسەند بکات.

 

وێنە گەورەکە: هەوڵەکانی دۆناڵد ترەمپ، سەرۆکی ئەمریکا بۆ کۆتاییهێنان بە جەنگی نێوان ڕووسیا و ئۆکراینا بەردەوامە و دوورگەی کریمیاش یەکێکە لە خاڵە گرنگ و یەکلاکەرەوەکانی دانوستاندنەکانی نێوان وەفدی ئەمریکا و ڕووسیا، کیێڤیش نایەوێت دەستبەرداری کریمیا ببێت و دۆناڵد ترەمپ بە فشارخستنە سەر زیلێنسکی دەیەوێت بە زووترین کات پرسەکە یەکلابکرێتەوە و ئاگربەستی هەمیشەیی ڕابگەیێنرێت.

 

لێدوانی فەرمی: دۆناڵد ترەمپ، سەرۆکی ئەمریکا لە چاوپێکەوتنێکی ڕۆژنامەوانیدا ڤۆلۆدیمێر زیلێنسکی، سەرۆکی ئۆکراینا تۆمەتبار دەکات بە درێژکردنەوەی ماوەی جەنگ و کات بە فیڕۆدان بۆ ئەنجامدانی ڕێکەوتننامەی ئاشتی و ڕایگەیاند، لەپێناو ڕاگرتنی جەنگ و بەدیهێنانی ئاشتی بەردەوام، دوورگەی کریمیا دەبێت بە خاکی ڕووسیا و زیلێنسکیش دەبێت واژۆ لەسەر ئەو ڕێکەوتننامەیە بکات و بۆ هەمیشە کێشەی دوورگەی کریمیا کۆتایی پێبێت.

 

باکگراوند: لە ساڵی 2014 و لە سەردەمی سەرۆکایەتیی باراک ئۆباما لە کۆشکی سپی، ڕووسیا دەستیگرت بەسەر دوورگەی کریمیا و وەک بەشێک لە خاکی وڵاتەکەی ناساند.