سێ بەرپرسی باڵای توركیا سەردانی بەغدا دەكەن

ئاڤا نیوز

 

لە چوارچێوەی لوتکەی ئاسایشی نێوان تورکیا و عێراق، سبەی پێنجشەممە هاکان فیدان، وەزیری دەرەوە و یەشار گولەر، وەزیری بەرگری و ئیبراهیم کاڵن، سەرۆکی دەزگەی میتی تورکیا سەردانی بەغدا دەکەن.

 

وێنە گەورەکە: ئەم کۆبوونەوەیە هەنگاوی گەورەتری بەدواوەیە، چونکە باس لە وردەکاریی سەردانەکەی ڕەجەب تەیب ئەردۆغان، سەرۆککۆماری تورکیا بۆ بەغدا و هەولێر دەکرێت.

 

لێدوانی فەرمی: ئۆنجو کەچێلی، گوتەبێژی وەزارەتی دەرەوەی تورکیا ڕایگەیاند: "هیوادارین هەموو لایەنەکانی عێراق لە چوارچێوەی گفتوگۆ و لێکتێگەیشتنی هاوبەشدا بگەنە ڕێککەوتن و هەناردەکردنەوەی نەوت لەڕێگەی بەندەری جەیهانەوە دەستپێبکاتەوە".

 

بابەتی ستراتیژیی: لە کۆبوونەوەکەدا دەرفەتەکانی هاوکاری نێوان هەردوو وڵات لە بواری ئاسایش، پەرەپێدانی سەرچاوەکانی گازی سرووشتی، پەرەپێدانی پرۆژەی هاوبەش لە بواری وزە، هەناردەکردنەوەی نەوتی هەرێمی کوردستان لە بەندەری جەیهان تاوتووێ دەکرێن.

 

پێدراوە ڕاستەکان: پرسی هاوکاری ئاسایش و سەربازی نێوان هەردوو وڵات لە دانوستانەکانی سبەینێدا، یەکەم  بڕگەی کارنامەی کوبوونەوەکە دەبێت. پەرەپێدانی لێکتێگەیشتنێکی هاوبەش لە "بەرەنگاربوونەوەی تیرۆر" تاووتوێ دەکرێت.