لە زیقاڕ بەهۆی سەختی ژیان دەیان گەنج تووشی نەخۆشی دەبن

ئاڤا نیوز

لە پارێزگای زیقاری باشووری عێراق بەهۆی "سەختی ژیان و خراپی دۆخی ئابوورییەوە"ەوە دەیان گەنج تووشی نەخۆشی دەروونی و ماددەی هۆشبەر بوون، بۆ چارەسەرکردنیشیان لە هەموو پارێزگاکەدا تەنیا چوار پزیشکی دەروونی هەیە.

ژمارەکان وادەڵێن: بەپێی وەزارەتی پلاندانانی عێراق ساڵی 2018 ڕێژەی هەژاری لە پارێزگای زیقار 40% بووە، بەڵام ئێستا بۆ  15% دابەزیووە.

لێدوانی فەرمی: د. ئیبراهیم سەفا، یاریدەدەری ناوەندی ژیان بۆ چاکبوونەوە لە پارێزگای زیقار بە ئاڤا میدیای ڕاگەیاند، ناوەندەکەیان تاکە ناوەندی چارەسەرکردنی توشبووانی نەخۆشی دەروونیی و ماددە هۆشبەرەکانە و لە چارەگی یەکەمی ئەمساڵەوە پێشوازییان لە 642 نەخۆشی دەروونی کردووە (واتە ڕۆژی حەوت نەخۆش)، هاوکات چارەسەرییان پێشکەشی 149 تووشبووی ماددەی هۆشبەر کردووە (ڕۆژی دوو کەس).

- زۆرینەی توشبووانیش ئەو گەنجانەن کە لە بیستەکانی تەمەنیاندان، هۆکارەکەشی بۆ سەختی ژیان و تێکچوونی دۆخی ئابووری دەگەڕێتەوە کە وایکردووە زۆر کەس تووشی نەخۆشی دەروونی ببن یان وەک هەڵاتن لە ئازار بەشێوەیەکی کاتی، پەنا بۆ ماددەی هۆشبەر بەرن.

- لە پارێزگای زیقار کە دانیشتووانەکەی دوو ملیۆن و 300 هەزار کەسە تەنیا چوار پزیشکی دەروونی هەیە لەکاتێکدا بەپێی ستاندارد بۆ هەر 10 هەزار کەسێک دەبێت پزیشکێکی دەرونی هەبێت، واتە دەبووایە لە زیقار لانیکەم 230 پزیشکی دەروونی هەیە.

لەلایەکی دیکەوە: عەبدولحەسەن نیازی، نەقیبی پزیشکانی زیقاڕ دەڵێت، هۆکاری کەمی پزیشکی دەروونی ئەوەیە قوتابیان خواستییان نییە بچنە ئەو بەشە و بخوێنن، چونکە خوێندن تیایدا قورسە، بۆیە داوا دەکات هاندانی ماددی و مەعنەوی هەبێت و کورسی خوێندن لەم بەشەدا زیاد بکرێت، بەپێچەوانەوە کەمی پسپۆڕی لەم بەشدا ساڵ لەدوای ساڵ زیاتر دەبێت.