مەسرور بارزانی داواکاریی یەکێتی بۆ پۆستی سەرۆکی هەرێم ڕەت دەکاتەوە

ئاڤا نیوز

یەکێتی بەفەرمی داوای پۆستی سەرۆکی هەرێمی کوردستان لە پارتی دەکات، مەسرور بارزانیش ڕەتی دەکاتەوە و دەڵێت، دەیانەوێت پۆستەکە لای پارتی بێت و بە دیاریکراوی لای نێچیرڤان بارزانی بمێنێتەوە.

وێنە گەورەکە: دوای ئامادەکردنی ستراتیژیەت و ڕەشنووسی کارنامەی حکومەتی نوێی کوردستان لە دوو کۆبوونەوەی لووتکە و حەوت کۆبوونەوەی شاندی دانوستانکاری پارتی و یەکێتی، ئێستا گفتوگۆکان گەیشتوونەتە قۆناغێکی نوێ، بۆ یەکەمجار هاتوونەتە سەر دابەشکردنی پۆستەکان و بە ڕاشکاوی قسەی لەسەر دەکەن.

چیرۆکی سەرەکی: ڕۆژی دووشەممە 28-4-2025، مەسرور بارزانی، سەرۆکوەزیرانی کوردستان و جێگری سەرۆکی پارتی دیموکراتی کوردستان، بۆ سێیەم جار لەبارەی پێکهێنانی کابیەنی 10ی حکومەت لەگەڵ بافڵ تاڵەبانی، سەرۆکی یەکێتیی نیشتمانیی کوردستان لە هاوینەهەواری دووکان کۆبووەوە.

ئەوەی پێویستە بیزانیت: دوای تەواوبوونی کۆبوونەوەی دووقۆڵی مەسرور بارزانی و بافڵ تاڵەبانی کە دوای نانخواردنی نیوەڕۆ دەستیپێکرد و کاتژمێرێکی خایاند، جارێکی دیکە شاندی دانوستانکاری هەردوولا کۆبوونەوە و لە کەشێکی ئەرێنیدا گفتوگۆیان لەبارەی ئەجێندای حکومەت و دابەشکردنی پۆستەکان کرد. ئەمە هەشتەم کۆبوونەوەی نێوانیان بوو لەبارەی پێکهێنانی حکومەت.

زانیاریی تایبەت: لە کۆبوونەوەکانی ئەمڕۆدا یەکێتی داوای چەند پۆستێکی سیادی کردووە، لەناو پۆستەکانیش بە دیاریکراوی داوای پۆستی سەرۆکی هەرێمی کوردستانی کردووە، چونکە پۆستی سەرۆکی حکومەت هەر لە سەرەتاوە یەکلابووەتەوە کە لای پارتی دەبێت و مەسرور بارزانیش جارێکی دیکە پۆستەکە وەردەگرێت.

بۆچوونی بەرامبەر: ئاڤا زانیویەتی داواکارییەکە لەلایەن مەرسرور بارزانی ڕەتکراوەتەوە و گوتوویەتی: "دەمانەوێت ئەو پۆستە لای پارتی بێت و بەدیاریکراویش لای نێچیرڤان بارزانی بمێنێتەوە".

خاڵی ئەرێنی: بەپێی زانیارییەکانی ئاڤا، دوای تەوابوونی کۆبوونەوە دووقۆڵییەکە، لەکاتی هاتنەدەرەوە لەگەڵ مەسرور بارزانی، بافڵ تاڵەبانی بە شاندی دانوستانکاری هەردوولای وتووە: "تەواو ئێمە ڕێککەوتین".