بەهۆی وەرگەڕانی پاسێکی قوتابیان 21 کەس بریندار دەبن

ئاڤا نیوز
لە سلێمانی پاسێکی قوتابیان وەرگەڕاوە و بەو هۆیەوە 21 کەس برینداربوون، بریندارەکان گەیێنراونە نەخۆشخانە.

لێدوانی فەرمی: سامان نادر، وتەبێژی تەندروستیی سلێمانی بە ئاڤای ڕاگەیاند: لە نزیک سەیرانگەی کونە ماسی پاسێک وەرگەڕاوە، پاسەکە 20 قوتابی تێدا بووە و 14 لە قوتابییەکان بریندار بوونە، هەموو بریندارەکانیش گەیێنراونەتە نەخۆشخانەی شار.

- قوتابییەکان چوونەتە گەشت و سەیران و لەکاتی گەڕانەوە پاسەکەیان وەرگەڕاوە.

لەلایەکی دیکەوە: نەژاد عەبدوڵڵا، بەڕێوەبەری گشتیی پەروەردەی سلێمانی ڕایگەیاند، قوتابیانی قوتابخانەی برایەتی بنەڕەتی لەکاتێکدا چوون بۆ سەیران تووشی ڕووداوی هاتووچۆ بوون، تاوەکو ئێستا 14 قوتابی کە باری تەندروستییان ناجێگیر بووە، لەگەڵ چوار مامۆستا و فەرمانبەر، لەگەڵ سێ منداڵی مامۆستا و فەرمانبەرەکان گەیێنراونەتە نەخۆشخانە.

ئەوەی پێویستە بیزانت: لەو ژمارەیە دوو مامۆستا و دوو قوتابی باری تەندروستییان زۆر خراپە و پێویستان بە نەشتەرگەری هەیە و ڕەنگە لە بەشی چاودێری چڕ بهێڵرێنەوە، ئەوانی تر چارەسەریان بۆ کراوە و ڕەوانەی ماڵەوە کراونەتەوە.