ئیسرائیل لە چەند کاتژمێرێکدا 20 هێرشی ئاسمانی دەکاتە سەر سووریا

 

ئاڤا نیوز

 

بەپێی ڕاپۆرتێکی ڕوانگەی سووری بۆ مافەکانی مرۆڤ، درەنگانی شەوی ڕابردوو فڕۆکە جەنگییەکانی ئیسرائیل زیاتر لە 20 هێرشی ئاسمانییان کردووەتە سەر بنکە سەربازییەکانی سووریا.

 

وێنە گەورەکە: دوای چەند کاتژمێرێک لە هێرشێکی ئیسرائیل بۆ نزیک کۆشکی سەرۆکایەتیی سووریا،  شەوی ڕابردوو جارێکی دیکە، سوپای ئیسرائیل نزیکەی 20 هێرشی ئاسمانی کردە سەر ریفی دیمەشق و چەند ناوچەیەکی جیاوازی سووریا و بەهۆیەوە هاووڵاتییەکی مەدەنی کوژرا و چەندین کەسی دیکەش برینداربوون.

 

ڕاگەیێنراوی فەرمی: سوپای ئیسرائیل ڕایگەیاند: بە فڕۆکەی جەنگی هێرشیان کردووەتە سەر ناوچەیەکی سەربازی و  تۆپخانەیەکی دژە فڕۆکە. هاوکات ڕاشیگەیاند، سوپای ئیسرائیل لەپێناو پاراستنی هاووڵاتیانی ئیسرائیلی بەردەوام دەبێت لە هێرشەکانی  و  بەپێی پێویست مامەڵە دەکات".

 

لەلایەکی دیکە: بنیامین نەتانیاهۆ،  سەرۆکوەزیرانی ئیسرائیل و ئیسرائیل کاتز وەزیری بەرگریی ئیسرائیل ڕایانگەیاند، هێرشەکە "پەیامێکی هۆشدارییە" بۆ حکومەتی سووریا و دەبێت بزانن ئیسرائیل ڕێگە بە جێگیرکردنی هیچ هێزێک لە باشووری دیمەشق یان هەر هەڕەشەیەک بۆ سەر درووزەکان نادات.

 

باکگراوند: ڕۆژی سێشەممەی ڕابردوو شەڕ لەنێوان چەکدارانی درووز لەلایەک و چەکدارانی سەر بە دەسەڵات و هێزەکانی ئاسایشی وەزارەتی ناوخۆ لەلایەکی دیکە لە شارۆچکەکانی جرمانە و سەحنایە لە پارێزگای ڕیفی دیمەشق و لە چەند ناوچەیەکی شاری سوەیدا لە سووریا ڕووی دا.