کارەبای زیاتر لە 10 گەڕەکی دیکەی سلێمانی دەکرێت بە 24 کاتژمێری

ئاڤا نیوز

 

تیمی پڕۆژەی ڕووناکی لە بەشێکی دیکەی گەڕەکەکانی سەنتەری پارێزگای سلێمانی، ئامادەکاری بۆ گەیاندنی کارەبای 24 کاتژمێری بۆ ئەو گەڕەکانە دەکات و هەزاران هاوبەشی دیکە سوودمەند دەبن.

 

وێنە گەورەکە: لە چوارچێوەی گەیاندنی پڕۆژەی ڕووناکی بە شاری سلێمانی، کە یەکێکە لە پڕۆژە ستراتیژی و گرنگەکانی کابینەی نۆیەم، 10 گەڕەک و بەشێکی بازاڕی شارەکە  لە کارەبا 24 کاتژمێرییە سوودمەند دەبن کە ژمارەیان 13 هەزار هاوبەشە، ڕۆژ بە ڕۆژیش سنووری ڕووناکردنەوەی ماڵەکان فراوانتر دەبێت.

 

لێدوانی فەرمی: سیروان محەممەد، گوتەبێژی کارەبای سلێمانی بە ئاڤای گوت، "بۆ قۆناغی سێیەمی پڕۆژەی ڕووناکی 25 فیدەری دیکە دەگرێتەوە، واتا سەرووی 10 گەڕەکی دیکە کارەبایان دەبێتە 24 کاتژمێری و هەزاران هاوبەشی دیکە سوودمەند دەبن".

 

باکگراوند: مانگی 10ـی ساڵی ڕابردوو سەرۆکوەزیران مەسرور بارزانی، لە گەڕەکی شادی هەولێر پڕۆژەی ڕووناکی ڕاگەیاند، لەو کاتەوە تا ئێستا سەدان هەزار هاونیشتمانی کارەبای 24 کاتژمێرییان بۆ دابینکراوە.