سوودانی و شیعە ترسیان لە کشانەوەی پارتی لە بەغدا هەیە

ئاڤا نیوز

پارتی بژاردەی کشانەوە بە گوێی بەرپرسانی عێراقدا دەدات، بژاردەیەک کە سوودانی و سەرکردەکانی شیعە لێی دەترسن.

وێنە گەورەکە: چاوەڕوان دەکرێت پارتی دیموکراتی کوردستان هەڵوێستی تووندتر بەرامبەر فشار و بڕیارەکانی دادگەی فیدراڵی عێراق دژی قەوارەی هەرێمی کوردستان بنوێنێت، یەکێک لە هۆشدارییەکانیشی کشانەوەیەتی لە پرۆسەی سیاسیی عێراق.

زانیاریی تایبەت: دوای کشانەوەی عەبدولرەحمان زێباری لە دادگای فیدراڵی، لە بەغدا ترسێکی زۆر دروست بووە لە کشانەوەی پارتی لە پرۆسەی سیاسی، بەڵام یەکێک لەو هۆکارانەی ڕەنگە بەربەست بێت لەبەردەم کشانەوە، پەیوەندیی باشی سوودانی و سەرۆکوەزیران مەسروور بارزانییە.

شرۆڤەکاران چی دەڵێن: ئیحسان شەممەری، شرۆڤەکاری سیاسی هاوڕایە کە چوارچێوەی هەماهەنگی ترسی هەیە لە کشانەوەی پارتی لە بەغدا و پێیوایە، هەولێر توانای دانانی کاریگەریی هەیە لەسەر بەغدا.

کشانەوەی دادوەر عەبدولڕەحمان زێباری لە دادگای فیدراڵی، پەیامێکی تووند بوو لە هەولێرە بۆ بەغدا، هاوکات هۆشدارییەک بوو بۆ هاوبەشەکانی لە چوارچێوەی هەماهەنگی کە ئارەزووی کەمکردنەوە و لاوازکردنی دەسەڵاتەکانی هەرێمی کوردستانیان هەیە.

هەنگاوی داهاتوو: شەممەری بۆ ڕۆژنامەی شەرقلئەوسەت قسەی کردووە و پێیوایە، ئەگەر حکومەتی ناوەندی لە بریارەکانی دژی هەرێمی کوردستان نەوەستێت، پارتی هەنگاوی تووندتر دەنێت، وەکو کشانەوە لە پەرلەمانی عێراق و ڕەنگە بەشداری وەزیرەکانی لە حکومەتی عێراقیش هەڵپەسێرێت.

قووڵتر: یەحیا کوبەیسی، شرۆڤەکاری سیاسی پێیوایە، هەرێمی کوردستان پەیوەندی باشی لەگەڵ وڵاتان هەیە، دەکرێت بەکاریان بهێنێت بۆ گوشارخستنە سەر بەغدا لە زۆر دۆسیەدا، بەتایبەتی کۆمەڵگەی نێودەوڵەتی باش دەزانێت کاراکتەی سیاسی شیعی لە بەغدا، بەتایبەتیش هاوپەیمانەکانی ئێران بەتەواوەتی دەسەڵاتیان کۆنترۆڵ کردووە.