لە چەمچەماڵ باوبۆران قوتابخانەیەک دەڕوخێنیت

ئاڤا نیوز

باوبۆرانی بەهێز لە قەزای چەمچەماڵ پۆلەکانی قوتابخانەی گوڵشەنی بنەڕەتی دەڕووخێنێت، پەروەردەی چەمچەماڵیش بۆ چارەسەری کێشەکە بڕیاریداوە لەجێی پۆلە ڕووخاوەکان کەرەڤانەی نوێ دابنێت.

چیرۆکی سەرەکی: لەچەند ڕۆژی ڕابردوو شەپۆلێکی توند و چڕی با و باران ڕووی لە ناوچەکانی هەرێمی کوردستان کرد، بەهۆیەوە قوتابخانەیەک لە گوندی گورگەیی لە سنووری قەزای چەمچەماڵ کە لە سێ کابینە پێکهاتبوو دەڕوخێنێت و ئێستا قوتابخانەکە تەنیا یەک پۆلی ماوە قوتابییەکانی تێیدا بخوێنن.

ئەوەی پێویستە بیزانیت: قوتابخانەی گوڵشەن، دەکەوێتە گوندی گورگەیی، قوتابخانەکە باڵەخانەی تایبەتی نییە و چەند ساڵێکە قوتابییان لە کەرەڤانەدا دەخوێنن، ڕەشەبای بەهێز دوو کەرەڤانەی قوتابخانەکەی بەتەواوی ڕووخاند و ئێستا تەنیا یەک پۆلی ماوە ئەویش بەشی قوتابیانی گوندەکە ناکات.

لێدوانی فەرمی: عەبدوڵڵا کاکەڕەش، بەڕێوەبەری پەروەردەی چەمچەماڵ بە ئاڤا میدیای ڕاگەیاند، ئەو کەرەڤانەی ماوەتەوە ئەمڕۆ بۆ خوێندن و تاقیکردنەوەکانی قوتابییانی قوتابخانەکە بەکارهێنراوە، "سبەی دەست بە چارەسەرکردنی کێشەکە دەکەین و کەرەڤانەی نوێ ڕەوانەی گوندەکە دەکەین تاوەکو قوتابییەکان لە خوێندن دانەبڕێن".

- ڕووداوەکەدا تەنیا زیانی ماددی هەبووە و هیچ زیانێکی گیانی لێ نەکەوتووەتەوە، "ئەو چارەسەرەی ئێستاش دەیکەین کاتییە و دەمانەوێت نووسراوێکی تایبەت بەرزبکەینەوە تاوەکو قوتابخانەیەکی شایستە و گونجاو بۆ گوندەکە دروست بکەین".