كۆبوونەوەی لووتكەی ئاسایشی عێراق-توركیا دەستیپێكرد

ئاڤا نیوز

لووتکەی ئاسایشی عێراق-تورکیا بە بەشدارى بەرپرسانی باڵای ئەمنیی عێراق و  تورکیا و وەزیری ناوخۆی هەرێمی کوردستان لە بەغدا دەستیپێکرد.

وێنە گەورەکە: لووتکەى ئاسایشی عێراق- تورکیا، بە بەشداری  فوئاد حوسێن، وەزیری دەرەوەی عێراق و قاسم ئەعرەجی ڕاوێژكاری ئاسایشی نیشتیمانی عێراق،فالح فەیاز سەرۆكی دەستەی حەشدی شەعبی. ڕێبەر ئەحمەد، وەزیری ناوخۆی هەرێمی کوردستان، هاکان فیدان، وەزیری دەرەوەی تورکیا و یەشار گولەر وەزیری بەرگری تورکیا، ئیبراهیم کاڵن سەرۆکی دەزگای هەواڵگری تورکیا،  بەڕێوەدەچێت.

ئەوەی پێویستە بیزانیت: بەرپرسانی تورکیا دەیانەوێت، لە نیسانی ئەم ساڵدا ئۆپەراسیۆنێکی گەورە لە ناو خاکی عێراق لە دژی پەکەکە بکەن، بۆ ئەمەش دەیانەوێت دەزگا ئەمنییەکانی عێراق هاوکاریان بن.

بابەتی ستراتیژی: پڕۆژەی رێگاى گەشەپێدانى تورکیا- عێراق، پەرەپێدانی سەرچاوەکانی وزە، پرسی هەناردەکردنەوەی نەوتی هەرێمی کوردستان لە بەندەری جەیهان- تورکیا، دەخرێنە سەر مێزی گفتووگۆ.

 

باكگراوند: لە ڕۆژی 19-12- 2023، یەكەم كۆبوونەوەی لووتكەی ئاسایش و وزەی توركیا-عێراق لە ئەنقەرە، بە بەشداری شاندێكی باڵای حكومەتی عێراق و هەرێمی كوردستان بەڕێوەچوو. ئەمڕۆ دووەم كۆبوونەوەی لوتكەكە لە ئەنقەرەوە بەرەو بەغدا گواسترایەوە.