بانکی ناوەنديی عێراق: ئەمریکا چاو بە سزاکان بۆ سەر ژمارەیەک بانک دەخشێنێتەوە

ئاڤا نیوز

بانکی ناوەندیی عێراق ڕایگەیاند، لێکتێگەیشتنێک هەیە ئەمریکا چاوخشاندنەوە بەو سزایانەدا بکات کە بەسەر بانکە عێراقییەکان دا سەپاندوویەتی.

لێدوانی فەرمی: عەلی عەلاق، پارێزگاری بانکی ناوەندیی عێراق لە کۆبوونەوەی لەگەڵ لیژنەی دارایی پەرلەمان ڕایگەیاندووە، نا جێگیری نرخی دۆلار بەهۆی بوونی بازرگانی نایاساییەوەیە، کە دۆلار بەکاش لە بازاڕەوە دەکێشنەوە.

زانیاریی زیاتر: کۆبوونەوەکان لەگەڵ گەنجینەی ئەمریکا بەردەوامن و لێکتێگەیشتنیش کراوە بۆ چاوخشاندنەوە بەو سزایانەی بەسەر بانکە عێراقییەکاندا سەپێندراوە، نابێت لە داهاتوودا ئەم جۆرە بڕیارانە دەربکرێن، بەبێ گفتوگۆکردن و ئاگادارکردنەوەی بانکی ناوەندی عێراق. عەلی عەلاق وای گوتووە.

بۆچی گرنگە: ئەو سزا دەرەکییانەی کە بەسەر ژمارەیەکی زۆر لە بانکە ناوخۆییەکانی عێراقدا سەپێندراون، بوونەتە ڕێگر لەبەردەم کردنەوەی پەیوەندی لەگەڵ بانکە پەیوەندیدارە نێودەوڵەتییە باوەڕپێکراوەکان.

ئەوەی پێویستە بیزانیت: وەزارەتی گەنجینەی ئەمریکا، سزای بەسەر حەوت بانکی عێراقیدا سەپاندووە و پێشتریش 14 بانکی دیکەی سزاداوە، عێراق داوای کردووە، واشنتن چاو بە بڕیاری سزادانی بانکەکانیاندا بخشێنێتەوە و سزاکانیان لەسەر لاببات.