لە شاخی گۆیژە دزی لە چەند شاخەوانێک دەکرێت

ئاڤا نیوز

چەند شاخەوانێک لەکاتی سەرکەوتنیان بەسەر گۆیژە ئۆتۆمبێلەکانیان لە بناری شاخەکە جێدەهێڵن کە دەگەڕێنەوە جامی ئۆتۆمبێلەکەیان شکێنراوە و 500 هەزار دینیاریان لێ دزراوە.

لێدوانی تایبەت: بەگوێرەی وتەی شایەدحاڵان لەم ماوەیەی دواییدا، دیاردەی دزیکردن و ڕێگریکردن لە شاخی گۆیژە زۆربووە، جگە لە دزینی کەلوپەل و شکاندنی جامی ئۆتۆمبێلی شاخەوانەکان، چەند کەسێک بە چەقۆ و دەمانچە هەڕەشە لە ژن و مێردێکی شاخەوان دەکەن و هەرچی پارە و کەلوپەلی کە پێیان بووە لێیان دەستێنن.

زانیاریی پەیامنێر: کچە شاخەوانێک لە سلێمانی بە ژیوار عەبدولڕەحمان، پەیامنێری ئاڤای ڕاگەیانووە: ڕێککەوتی 24ی نیسان، چووین بۆ شاخی گۆیژە و ئۆتۆمبێلەکانمان لە بناری شاخەکە بەجێهێشت، دوای چەند کاتژمێرێک کە گەڕاینەوە بینیمان جامی ئۆتۆمبێلەکانمان شکێنراوە و 500 هەزار دینار و شتی دیکەی ناو ئۆتۆمبێلەکانیان دزیوە.

بە گوێرەی قسەی ئەم کچەیە، ڕێکەوتی دوو و پێنجی ئەم مانگە، هەمان حاڵەتی شکاندنی جامی ئۆتۆمبێل و دزینی پارە و شتومەکی چەند شاخەوانێکی دیکە دووبارە بووەتەوە و دەڵێت: لای پۆلیس سکاڵا ناکەین و خۆمان تووشی بەڵا ناکەین.

لێدوانی فەرمی: سەرکەوت ئەحمەد، وتەبێژی بەڕێوەبەرایەتیی پۆلیسی سلێمانی دەڵێت: ئاگاداری ئەم بابەتەین، چەند کەسێک سکاڵایان کردووە و دەستمان بە لێکۆڵینەوەی ورد کردووە، بەمزووانە ئەو کەسانە دەدۆزینەوە.